Зэкъош адыгэ шъолъырхэм, Къэ­бэртэе-Бэлъкъар, Къэрэщэе-Черкес республикэхэм ыкIи Адыгеим ялъэпкъ гъэзетхэм язэдэлэжьэныгъэ нахь благъэ хъугъэу лъэкIуатэ. «Черкес хэкум» ыкIи «Адыгэ псалъэм» яжурналистхэу Аслъаныкъо Мадинэрэ НэкIэпыджэ Замирэрэ мы мафэхэм Адыгеим ихьакIэх.

Тхьамафэм къыкIоцI республикэм игъэхъагъэхэм защагъэгъозэщт, ицIыф цIэрыIохэм, IэпэIасэхэм аIукIэщтых, зекIоным шъолъырым зызэрэщиушъомбгъурэм нэIуасэ зыфашIыщт, илъэгъупхъэ чIыпIэхэр зэрагъэлъэгъущтых.
Журналистхэм республикэм IофшIэныр щамыублэзэ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр IукIагъэх. Гъэзетхэм язэдэлэжьэныгъэ мэхьанэ ин зэриIэр ащ ишIуфэс гущыIэ къыщыхигъэщыгъ.
— Iофэу ешъухьыжьагъэр дэгъу дэд. Тиреспубликэхэм щыIакIэу арылъыр, цIыфэу арысхэр пшIэнхэмкIэ ар амалышIу. ГъэшIэгъон дэдэ хъурэр мэфэкI гъэзет зэхэтэу, республикищми шапсыгъэ­хэм яери шъузэкIыгъоу къыдэжъу­гъэкIырэр ары. Гъэзетхэр япчъагъэкIэ мыбэ дэдэми, лъэпкъым лъыплъэхэрэм ашIогъэшIэгъон, ящыкIагъ, — къыхигъэ­щыгъ Шъхьэлэхъо Аскэр.
Джащ фэдэу Аслъаныкъо Мадинэрэ НэкIэпыджэ Замирэрэ гъэзетэу «Адыгэ макъэм» щылажьэхэрэм нэIуасэ афэхъугъэх, IофшIэкIэ амалэу агъэфедэхэрэмкIэ, шIыкIэу аIэкIэлъхэмкIэ зэдэгощагъэх, адыгэ журналистикэм иIофыгъохэм атегущыIагъэх.

Лъэпкъ гъэзетхэм язэдэлэжьэныгъэ илъэс пчъагъэ ыныбжь. Джы ащ шъошакIэ егъэгъотыгъэныр игъоу лъэпкъ гъэзетхэм яредакторхэм зэдаштагъ ыкIи зэфэкIо-зэлъыкIо IофшIэныр Къэрэщэе-Черкес Республикэм щырагъэ­жьагъ. Шъугу къэдгъэкIыжьын, блэкIыгъэ мазэм «Адыгэ макъэмрэ» «Адыгэ псалъэмрэ» яжурналистхэу Тэу Замирэрэ НэкIэпыджэ Замирэрэ Черкесскэ тхьамафэрэ щылэжьагъэх. Джы чэзыур Адыгеим къынэсыгъ.

НэкIэпыджэ Замир — КъБР-м ­илъэпкъ гъэзетэу «Адыгэ псалъэм» ижурналист, АР-м изаслуженнэ журналист:
— СэркIэ тизэдэлэжьэныгъэ лъэбэ­къукI. Джырэ нэс титхыгъэ­хэмкIэ тызэхъожьыщтыгъэмэ, джы тызэфэкIон, ткъош республикэм ищыIэкIэ-псэукIэ, щыхъурэ-щышIэрэр тынитIукIэ тлъэгъуни, тэ тигущыIэхэмкIэ, тизэхашIэхэмкIэ тиеджакIохэм алъыдгъэ­Iэсыжьын амал дгъотыгъэ. ЕтIанэ, журналист зэдэлэжьэныгъэм тишъолъырищ нахь зэпэблагъэ ышIэу сэлъытэ. Ащ мэхьанэшхо иI, сыда пIомэ, мары Къэ­рэщэе-Черкесым сызэрэщыIагъэр, ащ къисхыгъэ къэбархэр къызхэсэутыжьхэм, тигъэзетеджэхэм лъэшэу агу рихьыгъ, рыразэхэу бэ къыс­фытеуагъэр ыкIи къысэупчIыгъэх «Адэ Адыгеими шъукIощта?» аIуи. ЦIыфхэм ашIогъэшIэгъон къош республикэхэм ащыхъурэр, зэращыпсэухэрэр. Арышъ, тиредактор шъхьа­Iэхэм тафэраз мыщ фэдэ проектыр щыIэ зэрэхъугъэмкIэ.

Аслъаныкъо Мадин – КъЧР-м ­илъэпкъ гъэзетэу «Черкес Хэкум» ижурналист:
— ЛIэужыкIэ пэпчъ кIэ горэ къыхелъхьэ. Тигъэзетхэм аныбжь илъэси 100 зыхъухэрэм тэ тырихьылIагъ. Ащ тырэгушхо, ау ыкIи пшъэдэкIыжь ин. Илъэсишъэ зыныбжь гъэзетым имэфэкI хэбгъэунэфыкIыныр лъэпкъым ишIэжь. А шIэжьым тэ тыриухъумакIу. Арышъ, мы проектэу тызхэлажьэрэр а ­тарихъыр лъыкIотэнымкIэ зы лъэбэкъоу сэлъытэ.
Къош республикэхэм яжурналистхэм IофшIэгъу мэфэ жъотхэр къапыщылъых. ЗыдэкIощтхэмрэ, зыдэгущыIэщтхэмрэ, зэрагъэлъэгъущтымрэ бэ. Рахъухьагъэм щыщэу апэрэ мафэм къуаджэу Мэфэхьаблэ Аслъаныкъо Мадинэрэ НэкIэпыджэ Замирэрэ еблэгъагъэх. Адыгеим, КъБР-м, КъЧР-м я и ­Лъэпкъ тхакIоу, УФ-м Iоф­шIэнымкIэ и ЛIыхъужъэу МэщбэшIэ Исхьакъ IукIа­гъэх, кIэлэцIыкIухэм апае къыдэкIырэ журналхэу «Жъогъобын» ыкIи «Родничок» зыфиIохэрэм яIофшIэн зыщагъэгъозагъ.
МэщлIэкъо Саид – АР-м илъэпкъ гъэзетэу «Адыгэ макъэм» иредактор шъхьаI, АР-м изаслуженнэ журналист:
— Адыгеим изэмылIэужыгъуагъэ къытетхыхьанхэм пае тихьакIэхэм яIоф­шIэгъу дэкIыгъо лъэныкъо зэфэшъхьафхэр къыдыхэтлъытагъ. Къэзгъэ­зэжьыгъэхэр щыIакIэм зэрэхэгъозэжьыгъэхэр, Мэфэхьаблэ непэ зыфэдэ хъугъэр зэрагъэшIагъ. Тиреспуб­ликэкIэ мэхьанэ ин зиIэ хъугъэ зекIоным зызэриушъомбгъурэм, чIыпIэ дахэу тиIэхэм нэIуасэ афэтшIыщтых. Ежь ­ткъош рес­публикэхэми чIыопс хьалэмэтхэр яIэхэми, тэтыер ащ зэратекIырэр зэрагъэ­лъэгъущт. Джащ фэдэу тиIэпэIасэхэм нэIуасэ афэтшIыщтых, Еутых Асе дэжь еблэгъэщтых. Мыхэм ащыщыбэхэм ягъэ­зет нэкIубгъо­хэм бэрэ ягугъу къащытшIэу хъугъэ, ау джы ежь анэкIэ алъэгъурэр къатхы­жьыщт, язэхашIэхэмкIэ къыраIотыкIыщт. Ар сыдигъуи нахь гъэшIэгъон. Арышъ, мыщ фэдэ шIыкIэм тетэу тизэдэлэжьэныгъэ дгъэпытэщт, тэ тапэкIэ Iоф зышIэщтыгъэ нахьыжъхэм рахьыжьа­гъэр лъыдгъэкIо­тэщт. Мыгъэ изакъоп, илъэс къэс джащ фэдэу тызэфакIозэ тызэдэлэжьэн тимурад.
Непи къош республикэхэм яжурналистхэм тишъолъыр мэфэ гъэшIэгъон щагъэкIощт. Къушъхьэлъэ Адыгеим ичIыпIэ дахэхэу, республикэм инэпэеплъ хъугъэхэр зэрагъэлъэгъущтых. Мышъэкъо къушъхьэ тIуакIэр, Рыфабгъо псыкъе­фэххэр, Лэгъонэкъэ бгытешъор зекIобэ кIуапIэ зышIхэрэр ежь ашъхьэкIэ аушэтыщт. Нэужым, ячIыпIэхэм загъэзэжькIэ, Адыгеим щаугъоигъэ къэбархэр ягъэзетхэм къащыхаутыщтых. Апэрэ тхыгъэ­хэр Адыгэ Республикэм имэфэкI тефэу, чъэпыогъум и 5-м, къош гъэзетхэм къарыхьащтых.
Анцокъо Ирин.
Сурэтхэр: Анцокъо Ирин.