КIэлэеджэкIо миным ехъу хэлэжьагъ
Урысые кIэлэцIыкIу гупчэу «Орленок» зыфиIорэм щызэхащэгъэ шIэныгъэ лекциеу «Математика погони на электросамакате» зыфиIорэр кIэлэеджакIохэм ашIогъэшIэгъоныгъ.
ШIэныгъэхэмкIэ Урысые академием хэтэу, зэлъашIэрэ шIэныгъэлэжьэу Алексей Савватеевым къытыгъэ лекцием нэмыкIэу академием ипрофессорэу, хэушъхьафыкIыгъэ отделым ипащэу Дмитрий Вибе ныбжьыкIэхэм лъэныкъо зэфэшъхьафхэмкIэ гущыIэгъу афэхъугъ. Адыгэ къэралыгъо университетым зэхищэрэ шIэныгъэм и Фестиваль къыдыхэлъытагъэу ар кIуагъэ. НыбжьыкIэ миным ехъу хэлэжьагъ.
— Фестивалыр анахь гъэшIэгъон ыкIи мэхьанэ ин иIэ зышIырэр зэлъашIэрэ шIэныгъэлэжьхэм ныбжьыкIэхэр нэIуасэ зэрафэхъухэрэр, ахэм ялекциехэм ядэIунхэ амал зэряIэр ары. Ятфэнэрэ фестивалым хэлажьэхэрэм Алексей Саватеевыр ыкIи Дмитрий Вибе нэIуасэ, гущыIэгъу афэхъугъэх, — къыIуагъ Адыгэ къэралыгъо университетым иректорэу, проектэу «Наука вокруг» зыфиIорэм ипащэу Мамый Даутэ.
Алексей Савватеевым хьисапым епхыгъэ лъэныкъохэр ыкIи джэгукIэхэм ятеориехэр зэхефых. Фестивалым хэлажьэхэрэм апае хэушъхьафыкIыгъэ лекциеу «Математика погони на электросамокате» зыфиIорэр афызэхигъэуцуагъ. Дмитрий Вибе илекцие космическэ щынэгъончъэным фэгъэхьыгъ. Астеройдхэм якъефэхын ыкIи тыгъэр лъэшыщэу къызэрепсырэм гумэкIыгъохэр къыздихьынхэ зэрилъэкIыщтым ар къатегущыIагъ.
Фестивалым къыдыхэлъытагъэу мы мафэм тематическэ площадкэ 40 фэдизмэ Iоф ашIагъ. Хьисапым, биологием, физикэм, астрофизикэм, химием ыкIи IT-м нахь игъэкIотыгъэу кIэлэеджакIохэр нэIуасэ фэхъугъэх. Ушэтын зэфэшъхьафхэм ахэр ахэлэжьагъэх, тыгъэм исистемэ нэIуасэ фэхъугъэх, цIыфым и ДНК агъэнэфагъ ыкIи нэмыкI лъэныкъохэр зэрагъэшIагъэх. Научнэ кином епхыгъэ лабораторием документальнэ фильмэу «Ковчег» зыфиIорэм щеплъыгъэх, Кавказ заповедникым къыщыкIыхэрэм ыкIи псэушъхьэу хэсхэм нэIуасэ афэхъугъэх. Анахь чанхэр интеллектуальнэ джэгукIэу «Стихии науки» зыфиIорэм хэлэжьагъэх.
Адыгэ къэралыгъо
университетым
ипресс-къулыкъу.