Адыгеим хэушъхьафыкIыгъэ дзэ операцием иветеранхэм ыкIи ахэм яунагъохэм арысхэм апшъэрэ еджапIэхэм ыпкIэ хэмылъэу ащеджэнхэмкIэ фитыныгъэу яIэр къызфагъэфедагъ.

Дзэ операцием къикIыжьыгъэ ве­теранхэм сэнэхьат ыкIи зыми емыжэхэу IофшIэпIэ чIыпIэ зэрагъэгъотынымкIэ фитыныгъэ яI. Лъэныкъо пстэумкIи IэпыIэгъу афэхъухэзэ, а Iофыгъохэр афызэшIозыхыхэрэр фондэу «Хэгъэгум иухъумакIохэр» зыфиIорэр ары.
Фондым исоциальнэ координаторхэм чанэу яIофшIэн зэрагъэцакIэрэм ишIуа­гъэкIэ ветеранхэм ыкIи ахэм яунагъохэм арысхэм еджэпIэ зэфэшъхьафхэм бюджет чIыпIэхэр ащаратыгъэх. Мыекъопэ къэралыгъо технологическэ университетым ифакультетэу «Таможенное дело» зыфиIорэм зы нэбгырэ, колледжэу «Синергия» зыфиIорэм иотделениеу «Юриспруден­цием» — 2, университетэу «Синергием» ифакультетэу «КъэбарлъыгъэIэс технологиехэр» зыфиIорэм зы нэбгырэ ачIэхьагъэх.
Шъугу къэдгъэкIыжьын хэушъхьафыкIыгъэ дзэ операцием иветеранхэм ыкIи ахэм яунагъохэм арысхэм апае IэпыIэгъу зэфэшъхьафхэр зэрэщыIэхэр. Ахэм афэгъэхьыгъэ къэбарыр къэралыгъо фэIо-фашIэхэм я Портал ижъугъотэщт ыкIи пэIудзыгъэ шIыкIэм тетэу зыщышъутхын шъулъэкIыщт.