Физикэм и Урысые мафэ фэгъэхьыгъэ Iофтхьабзэхэр мы мафэхэм шъолъыр зэфэшъхьафхэм ащызэхащагъэх. АдыгеимкIэ АКъУ-р егъэблэгъапIэ хъугъэ.

Iоныгъом и 16-м къыщегъэжьагъэу и 22-м нэс зэIукIэгъухэр, лекциехэр Урысыем икъэлэ 20-мэ адэт апшъэрэ еджэпIэ 23-мэ ыкIи шIэныгъэ гупчэхэм ащыкIуагъэх. Программэм къыдыхэлъы­тагъэу физическэ диктантхэр, къэгъэлъэгъонхэр, джэгукIэхэр, квестхэр зэхащагъэх.
Адыгэ къэралыгъо университетыр физикэм и Урысые мафэ хэзыгъэунэфыкIыхэрэм ащыщ хъугъэ. Мы мафэхэм республикэм икъалэхэм ыкIи ирайонхэм къарыкIыгъэ кIэлэеджакIохэр апшъэрэ еджапIэм къырагъэблэгъагъэх. ФизикэмкIэ ыкIи астрономиемкIэ яшIэныгъэхэм ахагъэхъуагъ.
ГущыIэм пае, автомобилыр нахь благъэу къэкIуатэ зыхъукIэ, сиренэм ымакъэ нахь лъэш зыкIэхъурэр, зэлъа­шIэрэ фильмэу «Интелстеллам» ишъэф­хэр физикэ шIэныгъэмкIэ къызэрэпшIэщтхэр ныбжьыкIэхэм къагурыIуагъ. Ащ нэмыкI упчIэ гъэшIэгъонхэм яджэуапхэри кIэлэеджакIохэм агъотынхэ амал яIагъ.
— Физикэм и Урысые мафэ Урысыем зэрэщыхагъэунэфыкIырэм мэхьанэшхо иI. Физикэр — шIэныгъэ шъхьаIэхэм ащыщ. Хэгъэгум технологическэ хэхъоныгъэхэр ышIынхэмкIэ шIогъэ­шхо мы предметым иI. Гурыт еджапIэхэм зэращызэрагъа­шIэрэм, апшъэрэ еджапIэм къы­чIахьэхэрэм яухьазырын ахагъа­хъомэ, ишIуагъэ къэкIонэу сэлъы­тэ. Инженер сэнэхьатыр зэзыгъэгъотыхэрэм япчъагъэ нахьыбэ шIыгъэн фае. КIэлэ­еджакIохэм физикэр ашIогъэшIэгъоныным, ащ епхыгъэ сэнэхьатхэм афеджэнхэу къыхахыным мэхьанэшхо етэты, — къыIуагъ Адыгэ къэралыгъо университетым ипроректорэу Беданэкъо Мурат.

Iофтхьабзэм къекIолIэгъэ кIэлэеджа­кIохэм физическэ ушэтынхэр арагъэшIыгъэх, астрономием епхыгъэу къэгъэ­лъэгъонхэр афызэхащагъэх. Программэм къыдыхэлъытагъэу кIэлэеджакIохэм зэнэкъокъу зэфэшъхафхэр афызэхащагъэх, тестхэр къарагъэшIыгъэх, инженериемкIэ зэнэкъокъухэр афызэхащагъэх. Джащ фэдэу астрономием епхыгъэу телескопыр зэрэбгъэфедэщтым фагъэсагъэх, жъогъо быным икартэ «къызэреджэщтхэр» арагъэлъэгъугъ. Ащ нэмыкIэу аудиториехэм инженер джэгукIэхэу «Путь физика» ыкIи «Своя игра» зыфиIохэрэр афызэхащагъэх. ШIоигъоныгъэ зиIэхэм Урысые физическэ диктант атхыгъ. Iофтхьабзэм нахь чанэу хэлэжьагъэхэм шIухьафтынхэр аратыгъэх.
Федеральнэ проектэу «Физика для всех» зыфиIорэм къыдыхэлъытагъэу физикэм и Урысые мафэ мыгъэ ятIо­нэрэу хагъэунэфыкIы, Константин Циолковскэр къызыхъугъэ мафэм ар рап­хыгъ.