Проектэу «Школа новых медиа» зыфиIорэр мы мафэхэм Мыекъуапэ щыкIуагъ. АР-м ныбжьыкIэ IофхэмкIэ и Комитет, «Движение Первых» зыфиIорэм ишъолъыр къутамэ зэгъусэхэу ащ кIэщакIо фэхъугъэх. Лъэпкъ проектэу «Гъэсэныгъэм» ишъолъыр проектэу «Урысыем иныбжьыкIэхэр» зыфиIорэм ар къыдыхэлъытагъ.

Iофтхьабзэм нэбгырэ 200 фэдиз хэлэжьагъ, ахэр республикэм икIэлэ­еджакIох, истудентых ыкIи Iоф зышIэрэ ныбжьыкIэх. Аныбжь илъэс 14-м къыщегъэжьагъэу 35-м нэс.
Медиам ылъэныкъокIэ сэнэхьат зэфэшъхьафэу щыIэхэр ныбжьыкIэхэм арагъэшIагъэх. Проектым къыдыхэлъыта­гъэу лъэныкъуи 5-кIэ егъэджэнхэр зэхащагъэх: сурэт техынымкIэ, мобильнэ видеосъемкэмкIэ, графическэ дизайнымкIэ, журналистикэмкIэ.
Iофтхьабзэм хэлэжьагъэхэм спикер зэфэшъхьафхэм къагъэхьазырыгъэ егъэ­джэнхэм ямызакъоу, шIэныгъэу зэрагъэ­гъотыгъэхэр практическэ IофшIэнхэмкIэ аушэтыжьыгъэх. НыбжьыкIэхэр медиам ылъэныкъо нахь игъэкIотыгъэу нэIуасэ фэхъугъэх. Апэрэ мафэм ГТРК-у «Адыгеим» ипащэу Ацумыжъ Адам гущы­Iэгъу афэхъугъ. «Медиа» ыкIи «контект» зы­фиIорэм къарыкIырэр, джырэкIэ ахэр зэрэбгъэфедэщтхэр къафиIотагъ.
Iофтхьабзэм хэлажьэхэрэм зэкIэмкIи видеотехыгъи 8 зэхагъэуцуагъ, лъэтегъэ­уцо 18, къэбар жъугъэм иамалхэм а­гъэ­федэн алъэкIыщт къэбар 20 агъэ­хьазырыгъ. Ащ нэмыкIэу щыгъын зэфэшъхьафхэм ядизайн 25-рэ ыкIи сурэттехыгъэ 252-рэ агъэхьазырыгъ.
Спикерэу Анна Веклич къызэриIуагъэмкIэ, непэрэ мафэм зэкIэми телефонхэр аIыгъых, видео техыгъэ дахэхэр зэрэпшIыщтым зыфагъэсэнэу бэ фэя­гъэр. Лекциеу зэхищагъэм къыдыхэлъы­тагъэу нэбгырэ миллион зэплъыщт ролик зэрэзэхэбгъэуцон плъэкIыщтыр ащ къы­Iотагъ.
ЯтIонэрэ мафэм къэбархэр зэрифэшъуашэу къызэрипIотыкIыщтхэр, ащкIэ нахь унаIэ зытебгъэтын фэе лъэныкъо­хэр къыIотагъ республикэм изаслуженнэ журналистэу Валерия Врубель. Интервью къазэрэIыпхыщтыр, тэрэзэу узыфаер къызэрипIотыкIыщтыр ыкIи нэмыкIхэр проектым хэлэжьагъэхэм арагъэшIагъэх.
НыбжьыкIэхэм зэрагъэгъотыгъэ шIэныгъэхэр ыпэкIэ агъэфедэжьынхэ, мы лъэныкъом изэгъэшIэн нахь зырагъэ­ушъом­бгъун алъэкIыщт.
— ГущыIэнымкIэ IэпэIэсэныгъэ схэлъынэу сыфай. Ащ фэгъэхьыгъэ егъэджэнхэм сахэлэжьагъ. ГъэшIэгъоныбэ зэхэсхыгъ. ГущыIэхэр тэрэзэу къызэрэпIощтхэм, умыукIытэу узыфаер къызэрипIотыкIыщтым тыфагъэсагъ, — къыIуагъ кIэлэеджакIоу Екатерина Ермаковам.
НэкIубгъор зыгъэхьазырыгъэр ДЕЛЭКЪО Анет.
Сурэтыр: «Движение Первых» зыфи­Iорэм ишъолъыр къутам.