Мыекъуапэ и Мафэ 2024-рэ илъэсым чъэпыогъум и 5-м зэрэхагъэу­нэфыкIыщтым ехьылIэгъэ унашъор народнэ депутатхэм я Совет изимычэзыу сессие щаштагъ. Мы мафэм Iофтхьэбзэ шъхьаIэхэр зэхащэщтых. Унэгъо, ныбжьыкIэ, культурэ, спорт Iофтхьэбзэ зэфэшъхьафхэр зэрахьанхэу рахъухьэ. Анахьэу анаIэ зытырагъэтыщтыр я Хэгъэгу шIу алъэгъоу ныбжьыкIэхэр пIугъэнхэр, унэгъо хабзэхэм осэ икъу афэшIыгъэныр ары. Къэлэ зэнэкъокъоу «Унэгъо экипаж», сурэтхэмкIэ зэнэкъокъоу «Майкопская семья в объективе» зыфиIохэрэри зэхащэщтых. Iоныгъом и 23-м нэс ащкIэ лъэIу тхылъхэр аштагъэх.
Мы мафэм творческэ купхэм Мыекъуапэ изыгъэпсэфыпIэ парк, культурэм и Унэу «Гигантым» дэжь, В. И. Лениным ипчэгу, ТекIоныгъэм ибульвар закъыщагъэлъэгъощт. Республикэм и Мафэ Адыгеим икъалэхэми ирайонхэми ащыхагъэунэфыкIыщт. Къэгъэлъэгъон, концерт, музыкальнэ экспозицие 200-м ехъу зэхащэщт. Джащ фэдэу Адыгеим итворческэ куп пэрытхэмрэ искусствэхэмкIэ иIэпэIасэхэмрэ ягала-концерт чъэпыогъум и 5-м пчыхьэм Мыекъуапэ ипчэгу шъхьаIэ къыщатыщт.
Шъугу къэтэгъэкIыжьы мэфэкIыр мыгъэ зыгъэпсэфыгъо мафэм (шэмбэтым) зэрэтефэрэр. Ащ епхыгъэу мэфи 3 – чъэпыогъум и 5-м щегъэжьагъэу и 7-м нэс зыгъэпсэфыгъо мафэу агъэнэфагъэх.