Экологическэ шIэныгъэхэр цIыфхэм ягъэгъотыгъэнхэр непэрэ мафэм мэхьанэшхо зиIэ Iофхэм ащыщ. Ащ дэлэжьэгъэныр тхылъеджапIэхэми япшъэ­рылъ. АР-м и Лъэпкъ тхылъеджапIэ мы лъэныкъор нэплъэгъунчъэ ышIырэп. Ащ ишыхьат «Экологическэ шIэныгъэхэмкIэ АР-м и Лъэпкъ тхылъеджапIэ изэдэлэжьэныгъэхэр» зыфиIорэ Iэнэ хъураеу ригъэкIокIыгъэр. ТхылъеджапIэм иIофышIэхэр, тичIыопс, тыкъэзыуцухьэрэ дунаим изытет ыгъэгумэкIхэрэр, икъызэтегъэнэн дэлажьэхэрэр ащ хэлэжьагъэх. Ахэм ащыщ республикэм инэ­пэеплъ чIыопс ухъумапIэу ТхьачIышхо ипащэу Шэуджэн Инвер. Ащ къызэриIуагъэмкIэ, щыпэ теплъэр къызщызэтенэгъэ чIыпIэр укъуагъэ мыхъуным гъэлъэшыгъэу лъэп­лъэх. Волонтерхэр ягъусэхэу лъагъохэр, уцупIэхэр, псынэкIэчъхэр ауплъэкIух, ищыкIагъэмэ аукъэбзых. Джащ фэдэу псэушъхьэхэм ыкIи къэкIырэ уцхэм, анахьэу Тхылъ Плъыжьым дэтхэм, гъунэ алъафы.
ИдэхагъэкIэ ТхьачIышхо ыпшъэ ыгъэ­кIощтэп чIыопс ухъумапIэу «Псыхъоу Цацэ ипсыпшъэ» зыфиIорэм. Ащ ичIыпIэ хьалэмэтхэм атехыгъэ сурэтхэмкIэ псыхъом къешIэкIыгъэ дунаим нэIуасэ фишIыгъэх чIыопс паркым ипащэу ХъокIо Тимур. Джащ фэдэу адыгэ чIыгум ичIыопс къэкIуапIэхэм, ахэм якъэухъу­мэн, зыгъэпсэфыпIэхэм ыкIи псыхъо нэпкъхэм яукъэбзын афэгъэхьыгъэ упчIабэ Iэнэ хъураем щызэхафыгъ.
Анцокъо Ирин.