Адыгеим и Къэралыгъо автоинспекцие икIыгъэ тхьамафэм Урысые Iофтхьабзэу «ГъогурыкIоныр щынэгъончъэным и ЗыкI тхьамафэ» епхыгъэ Iофтхьабзэхэр ригъэкIокIыгъэх.

Ащ къыдыхэлъытагъэу зэнэкъо­къухэу, викторинэхэу, зэIухыгъэ урокхэу, нэмыкIхэу полицейскэхэм зэхащагъэхэм кIэлэеджэкIо миным ехъу ахэлэжьагъ.
ГъогурыкIоныр щынэгъончъэ­ным и ЗыкI тхьамафэ пшъэрылъ шъхьаIэу иIагъэр кIэлэцIыкIу гъогу-транспорт фыкъоныгъэр нахь макIэ шIыгъэныр ары. Мыщ Адыгеим ихэбзэ пащэхэм ыкIи иобщественность дырагъэштагъ.
ЗыкI тхьамафэм имэфэ шъхьа­Iэу алъытагъ Iоныгъом и 18-р. Ащ шъолъырым ит еджапIэхэр хэлэжьагъэх. Инспектор ныбжьыкIэхэм яотрядхэр (ЮИД), кIэлэегъаджэхэр яIэпыIэгъухэу гъогурыкIоныр щынэгъончъэным икъулайныгъэхэр къызыщыраIотыкIыгъэ Iофтхьэбзэ гъэшIэгъон­хэр ны-тыхэм, кIэлэеджакIохэм афызэхащагъэх.
Анахьэу анаIэ зытырагъэтыгъэхэм ащыщ телефонхэм, тхьакIумэ Iулъхьэхэм, нэмыкI гаджетхэм язэрарэу къакIорэр. Гъогу зэпырыкIыпIэхэм сакъыныгъэ къызщахагъэфэнэу, хэушъхьафыкIыгъэ чIыпIэхэм гъогур ащызэпачынэу, нэфынэр къэзытырэ пкъыгъохэр, ныбалъэ­хэр агъэфедэнхэм тхьамэфэ реным къыфэджагъэх. Унэм къикIынхэшъ, еджапIэм зэрэкIощтхэр, ащ къызэрикIыжьыщт гъогу щынэгъончъэхэр къызэрэхахыщт шIыкIэхэм ащагъэгъозагъэх.
ХэушъхьафыкIыгъэу анаIэ зытырагъэтыгъэхэм ащыщ кушъхьэ­фачъэр, СИМ-р, нэмыкI мототранспорт лъэпкъхэм ягъэ­федэнкIэ щыIэ шапхъэхэр къафаIотэнхэр.
Iофтхьабзэм хэлэжьагъэхэм зишIуагъэ къякIыщт тхыгъэхэр зэрыт тхьапэхэр полицейскэхэм афагощыгъэх.