ГъогурыкIоныр щынэгъончъэным и ЗыкI тхьамафэ къыдыхэлъытагъэу Адыгеим икъэралыгъо автоинспекторхэм кIэлэцIыкIухэм гъэсэныгъэ тедзэ зыщарагъэгъотырэ республикэ Гупчэу Мыекъуапэ дэтым пэшIорыгъэшъ Iофтхьабзэ щызэхащагъ.

ЗэIукIэгъум къекIолIэгъэ ­кIэ­лэеджакIохэм шIуфэс гущыIэхэмкIэ зафагъэзагъ гъогурыкIоныр щынэгъончъэнымкIэ Къэралыгъо инспекцием и Гъэ­IорышIапIэу АР-м щыIэм ипащэ игуадзэу, полицием иполковникэу Едыдж Мурат, кIэлэцIыкIухэм яфитыныгъэхэр къэухъу­мэгъэнхэмкIэ Уполномоченнэу Наталья Агеевам. ИлъэсыкIэ еджэгъур зэрэрагъэжьэжьыгъэм­кIэ кIэлэеджакIохэм афэгушIуа­гъэх, джащ фэдэу ахэм ящынэгъончъагъэ гъэпытэгъэнымкIэ гъогурыкIоным ишапхъэхэр дэгъоу ашIэнхэ зэрэфаер ыкIи щыIэныгъэм щагъэфедэжьы­шъунхэм мэхьанэ зэриIэр араIуагъ.
ЩыIэныгъэм къащышъхьа­пэщт шIэныгъэ дэгъухэр зыщарагъэгъотыгъэ Iофтхьабзэм еджэкIо 70-рэ зэрипхыгъ. ЗэхэщакIохэм комплексэу «Щынэгъончъагъэм илабораторие» илIыкIохэр ягъу­сэхэу гъогурыкIоным ишапхъэ­хэм япхыгъэ джэгукIэ гъэшIэгъонэу къэуцупIи 8-у зэхэтыр афызэхащагъ.
Ащ нэмыкIэу, кушъхьэфачъэр зезыфэхэрэм апае щыIэ шъуа­шэхэм ямакет агъэфедэзэ, лъэкъуитIу зыкIэт транспорт амалыр щынэгъончъэу ныбжьыкIэ цIыкIухэм зэрагъэзекIощтымкIэ яшIэныгъэхэр агъэпытагъэх.Iофтхьабзэм икIэухым кIэлэе­джакIохэр шIухьафтынхэмкIэ агъэгушIуагъэх.