Зыныбжь имыкъугъэхэм ящынэгъончъагъэ гъэпытэгъэным зэпымыоу автоинспекторхэр дэлажьэх. Ащ фэгъэхьыгъэ Iофтхьабзэхэм ны-тыхэри, общественностри къахагъэлажьэх.

Джыри зы Iофтхьабзэ — «Гъо­гу щынэгъончъагъэр унагъом къыщежьэ» зыфиIорэр — бэмышIэу Адыгэ республикэ ныбжьыкIэ тхылъеджапIэм автоинспекторхэм щызэхащагъ. Ащ хэлэжьагъэх кIэлэцIыкIухэм яфитыныгъэхэр къэухъумэгъэнхэмкIэ Уполномоченнэу Наталья Агеевар, тхылъеджапIэм иIофы­шIэхэр, ны-тыхэр, кIэлэе­джакIохэр.
Пэублэм кIэлэцIыкIухэр ыкIи Iэтахъохэр зыхэфэгъэ гъогу хъу­гъэ-шIагъэу республикэм щагъэ­унэфыгъэхэм япчъагъэ, ахэм ушъхьагъоу афэхъугъэр ны-тыхэм ашIэнхэм фэшI гъогу полицейскэхэр ахэм къатегущыIагъэх.
Наталья Агеевам къэзэрэугъоигъэхэм закъыфигъазэзэ, яцIыкIугъом къыщегъэжьагъэу сабыйхэр гъогурыкIоным ишап­хъэхэм афэбгъэсэнхэм дакIоу, ежь ны-тыхэм ящысэхэмкIэ ар арагъэшIэнэу зэрэщытыр къыхигъэщыгъ.
Сыд фэдэрэ пIуныгъэ-гъэсэныгъи унагъом къыщежьэнышъ, еджапIэм ар щылъагъэкIотэнэу щыт. НэмыкI лъэныкъохэу инс­пекторхэм анаIэ зытырадзагъэ­хэм ащыщ кIэлэцIыкIухэр еджапIэм зэрэкIощтхэ гъогу щынэгъончъэхэр нахьыжъхэм къызэрэхахынхэ, ахэм ялъфыгъэхэр арыкIонхэм фагъэсэнхэ зэрэфаер. Iалъмэкъэу аIыгъхэм, шъуашэу ащыгъхэм къэнэфырэ пкъыгъохэр ащымыгъупшэу ахалъхьанхэм джыри зэ ахэр къыфэ­джагъэх.
КъаIэтыгъэ Iофыгъохэм афэгъэхьыгъэ видеороликхэр Iоф­тхьабзэм хэлэжьагъэхэм къафагъэлъэгъуагъ.