Къэралыгъо ансамблэу «Ислъамыер» искусствэм иIэпэIасэхэм яя ХХIII-рэ Дунэе фестивалэу «Кавказым мамырныгъэ ерэлъ» зыфиIоу Къэбэртэе-Бэлъкъарым икъалэу Налщык щыкIуагъэм хэлэжьагъ.

Кавказым ыкIи дунаим мамырны­гъэр ащыгъэпытэгъэным фестивалыр фэгъэ­хьыгъагъ. ЦIыф лъэпкъхэм якультурэ къэухъумэгъэнымкIэ ыкIи хэхъоныгъэ егъэшIыгъэнымкIэ, зэкъошныгъэ зэфыщытыкIэхэр гъэпытэгъэнхэмкIэ мыщ фэдэ Iофтхьабзэхэм мэхьанэшхо яI.
Зэхахьэм иапэрэ мафэ искусствэм иIэпэIасэхэм ямэфэкI концертэу «Моя Республика, Моя Россия» зыфиIоу Театрэ ШхъуантIэм щыкIуагъэм творческэ купхэр хэлэжьагъэх. Ансамблэу «Ислъа­мыем» орэд-къэшъо шъуашэм илъэу «Уджыр» къыгъэлъэгъуагъ.
ЯтIонэрэ мафэм Нарткъалэ «Ислъамыем» хэушъхьафыкIыгъэ концерт къы­щитыгъ. Нэбгырэ 1000-м ехъу ащ еп­лъыгъ.
— ТилъэпкъкIэ адыгэ къашъом ыкIи орэдым мэхьанэшхо яI, ар тикультурэ игушъхьэлэжь баиныгъэ изы IахьышIу, адыгэм ыгу къигущыIыкIырэ шэн-хабз. ЦIыф лъэпкъыбэ фестивалым къекIолIагъ, фабэу къытпэ­гъокIыгъэх. Кавказым ис цIыфхэр къашъомрэ орэдымрэ гукIи псэкIи зэфащэх, — къы­Iуагъ купым ипащэу Нэхэе Азэмат.
«Ислъамыер» игъэпсыкIэ-шIыкIэкIи, лъэпкъ нэшанэр куоу хэгощагъэу къызэрэригъэлъэгъукIырэмкIи искусствэм ишэпхъэ лъагэхэм адештэ ыкIи зие адыгэ лъэпкъым лъэшэу икIас.
«Ислъамыер» адыгэ орэдым ыкIи къашъом абзэ куоу зэхэзышIэрэ, ахэм яухъумэкIо, язехьэкIо ансамблэшху. Ар зилъэкI-кIуачIэ къыхьыгъэр, адыгэ лъэпкъ орэдхэр зэзыгъэзэфэжьхи, шъошэ гъэ­нэфагъэ язытыгъэ композиторэу Нэхэе Аслъан ары. А гъогу дахэм тет «Ислъа­мыем» непэ ихудожественнэ пащэу, АР-м искусствэхэмкIэ изаслуженнэ IофышIэшхоу Нэхэе Азэмат.
Лъэпшъыкъо Фатим.
Сурэтыр: «Ислъамыем» ихъарзынэщ.