Урысые Iофтхьабзэм хэлажьэ
Урысые Федерацием культурэмкIэ и Министерствэ ыкIи «Таврида.АРТ» зыфиIорэм зэхащэгъэ программэу «Культурэм икапитанхэр» зыцIэм Мыекъопэ тхылъеджэпIэ системэм ипащэу Ирина Михайловар хэлажьэ.
Къырым творческэ индустриехэмкIэ и Академиеу «Меганомым» программэу «Культурэм икапитанхэр» зыфиIорэм иятIонэрэ уцугъо щыкIуагъ. МэзитIу зэкIэлъыкIохэм Урысыем исубъект 42-мэ культурэмкIэ яучреждении 124-мэ яIофышIэхэм яшIэныгъэхэм ахагъэхъощт, гъэIорышIэным епхыгъэу яIофшIэн къащышъхьапэжьыщт лъэныкъохэм ащагъэгъозэщтых.
Программэм хэлажьэхэрэр УФ-м культурэмкIэ и Министерствэ епхыгъэу Iоф зышIэхэрэр ары, ахэм ахэтых творческэ объединениехэм, культурэм, искусствэм япхыгъэу Iоф зышIэхэрэр, тхылъеджапIэхэм, театральнэ гупчэхэм, культурэм иунэхэм ыкIи творческэ еджапIэхэм япащэхэр. Нэбгырэ пэпчъ ишIэныгъэхэм зэрахагъэхъощтым имызакъоу, менеджментым ылъэныкъокIэ ыкIи яIофшIэнкIэ хэхъоныгъэхэр ашIынхэм пае шIэныгъакIэхэр арагъэгъотыщтых.
— Программэр зэрэзэхащэрэр сипшъашъэ къысиIуагъ. Креативнэ индустриехэмкIэ еджапIэм ипащэу ащ Iоф ешIэ, апэрэ уцугъом ежьыр хэлэжьагъ. Гъэхъагъэхэр пшIынхэу уфаемэ, уишIэныгъэхэм ахэбгъэхъо зэпытын фае. НэмыкI шъолъырхэм ащыпсэурэ тиIофшIэгъухэм нэIуасэ тызэрафэхъугъэр, ахэм яIофшIэн зэрэзэхащэрэр зэрэзэдгъэшIагъэм мэхьанэшхо яIэу сэлъытэ. Нэбгырэ пэпчъ экспертэу игъусагъэм ихьатыркIэ Iоф зэрэпшIэщт, хэхъоныгъэхэр зэрэпшIыщт лъэныкъохэр зэдгъэшIагъэх. УиIофшIэгъухэм гъэхъагъэхэр ашIынхэу уфаемэ, о къызщебгъэжьэн фае, — къыIуагъ Ирина Михайловам.
Программэу «Культурэм икапитанхэр» зыфиIорэм лъэныкъуитIу къызэлъеубыты. Апэрэр «Меганомым» щыкIуагъ, ащ хэлэжьагъэхэр стратегическэ гупшысэ яIэным ыкIи пэщэ IэнатIэм ифэшъошэ шIыкIэ-IуакIэхэр ахэлъынхэм фагъэсагъэх. Джащ фэдэу къэралыгъо культурнэ политикэм хэхъоныгъэхэр ышIынхэмкIэ ашIэн фаем мыщ щытегущыIагъэх.
ЯтIонэрэр шэкIогъум и 1-м къыщегъэжьагъэу и 6-м нэс кIощт. Пащэхэр зэолIэрэ гумэкIыгъохэр зэхафыщтых, пэщэ IэнатIэр зэрэбгъэцэкIэщтым, ащ ипшъэрылъхэм ыкIи нэмыкIхэм атегущыIэщтых.
Модульхэм азыфагу онлайн шIыкIэм тетэу программэм хэлажьэхэрэм консультантхэр ягъусэхэу IофшIэнхэр зэшIуахыщтых, проектхэм зэхъокIыныгъэхэр афашIыщтых.
Ащ ыпэкIэ программэу «Культурэм икапитанхэр» зыфиIорэм иапэрэ уцугъо бэдзэогъу мазэм кIуагъэ. Ащ хэлэжьагъэхэм зэрагъэгъотыгъэ шIэныгъэхэр агъэфедэнхэу рагъэжьагъ, гъэхъагъэхэр ашIых.
Зыгъэхьазырыгъэр
ДЕЛЭКЪО Анет.