Мыщ фэдэ цIэ зиIэ къэгъэлъэгъон Адыгэ Республикэм и Мафэу къэблагъэрэм ипэгъокIэу Адыгеим и Сурэт къэгъэлъэгъуапIэ къыщызэIуахыгъ.

Тиреспубликэ исхэм ямызакъоу, тишъолъыр зышIо­лъа­пIэхэмкIэ, ащ рыгушхохэрэмкIэ ыкIи ар ятарихъ чIыгужъэу зылъытэхэрэмкIэ мэхьанэшхо зиIэгъэ хъугъэ-шIагъэхэр къизыгъэлъэгъукIырэ сурэти 100-м ехъу къэгъэлъэгъоным хэхьагъ. Ахэм ахэтых Урысыем, Адыгеим янароднэ сурэтышIхэм, культурэм изаслуженнэ IофышIэхэм яIофшIагъэхэр, Сурэт къэгъэлъэгъуапIэм ифонд къыхэхыгъэхэри, унэе коллекциехэм ащыщхэри.
АР-м исурэтышIэхэм я Союз итхьаматэу Елена Абакумовам зэхахьэр къызэIуихыгъ.
— Адыгеим лъэныкъо зэфэшъхьафхэмкIэ ихэхъоныгъэхэр мыщ къыщыдгъэлъэгъуагъэх. Къушъхьэхэм ядэхагъэ, бжыхьэм тыкъэзыуцухьэрэ дунаир зэрэзэрихъокIырэр, нэмыкIхэми сурэтхэр афэгъэхьыгъэх. Адыгеим къэралыгъо гъэпсыкIэ иIэ хъуным дэлэжьэгъэ цIыфхэм ясурэтхэри къэгъэлъэгъуапIэм ифонд хэлъых. Ахэм тищыIэныгъэ къыраIотыкIы,— къыIуагъ Елена Абакумовам.

Искусствэм лъэпкъхэр зэрэзэфищэхэрэм имэхьанэ къыхигъэщызэ, къэралыгъо екIолIакIэ IофшIэнхэм зэрафишIырэр къыриIотыкIыгъ АР-м изаслуженнэ сурэтышIэу Ольга Бреславцевам.
Портрет пэпчъ къыоплъы, къыбдэгущыIэ, ахэм ахэтых лэжьэкIо Iэпшъэ емызэщыжьхэр. ГъэшIэгъонэу къигъэлъэгъукIыгъэх пэсэрэ къуаджэм ипсэукIэ, мэлахъоу мэлхэр зыгъэхъурэр, бжыхьэм ышъо зэщымыщ­хэр ыкIи нэмыкIхэр. Сурэт пэпчъ имэхьанэ зэрэкуур къыбгурэIо, титарихъ лIэужхэм алъыIэсыным къыфэджэ. Адыгеим исурэтышI цIэрыIохэу А. Бырсырым, Н. ЛэупакIэм, В Чэмышъом, Р. Хъуажъым, А. Къуанэм, Ю. СтIашъум, М. Тыгъужъым, П. Амасьян, нэ­мыкIхэм яIофшIагъэхэм узыIэпащэ.
Дунаим щыцIэрыIо сурэтышI-модельерэу, Адыгэ Республикэм куль­ту­рэмкIэ изаслуженнэ IофышIэу СтIашъу Юрэ къэгъэлъэгъоным фэ­гъэ­хьыгъэу къыIуагъ: «Адыгэ Респуб­ликэм имэфэкI фэгъэхьыгъэ зэха­хьэхэм сигуапэу сахэлажьэ. ТичIыгу щыпсэурэ лъэпкъхэм ятарихъ, ящыIакIэ, янепэрэ псэукIэ, чIыопсыр сурэтхэм къагъэлъагъо. ЛIэужыкIэм гурышэ-гупшысэ куухэр агу къыщигъэущыным, щыIэныгъэр икъоу зэха­рагъэшIэным къыфэджэрэ Iэпэщысэхэр непэ тинэрылъэгъух. Тидунай дахэ, мамырныгъэ щыIакIэ ащ ерэI».

Культурэм хэхъоныгъэ егъэшlыгъэныр къэралыгъом ипшъэрылъ шъхьаIэхэм ащыщ. А мэхьанэшхо зиIэ IофшIэным сурэтышIхэм яIа­хьышIу хэлъ. МэфэкIым ипэгъокIэу къэгъэлъэгъонэу агъэхьазырыгъэр чъэпыогъум и 6-м нэс рагъэкIо­кIыщт.
Лъэпшъыкъо Фатим.
Сурэтхэр авторым тырихыгъэх.