ФутболымкIэ Адыгеим ипервенствэ аухынкIэ зы тур къэнагъэу чемпионыр къэнэфагъ. Ар командэу «Мыекъуапэр» ары.

Мыщ ифутболистхэр Джэджэ районым илIыкIохэм аIукIагъэх ыкIи 6:1-у текIоныгъэр къыда­хыгъ. Республикэм икъэлэ шъхьаIэ икомандэ хэт Владислав Алентьевым гъогогъуищэ Iэгуаор къэ­лапчъэм дидзагъ.
БлэкIыгъэ турым мэхьанэшхо зиIэ текIоныгъэр къыщыдихыгъ Тэхъутэмыкъое районым икомандэ. Ар Красногвардейскэ рай­оныр къэзыгъэлъэгъорэ «Кавказым» дешIагъ ыкIи 7:0-у зэIукIэгъур къышIуихьыгъ. Тэхъутэмыкъуаехэм ахэт Георгос Колесниковыр къахэщыгъ, ащи гъого­гъуи­щэ Iэгуаор къэлапчъэм дидзагъ.

Аужырэ турым ехъулIэу ятIо­нэрэ чIыпIэр къыдэзыхыщтыр ары мыгъэнэфагъэр. Ащ фэбэнэщтых Кощхьэблэ ыкIи Тэхъутэмыкъое районхэм якомандэхэр. Мыхэр непэ сыхьатыр 4-м къуаджэу Кощхьаблэ щызэIукIэщтых.
Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Мыекъуапэ» — 36.
2. «Кощхьабл» — 31.
3. «Тэхъутэмыкъое район» — 30.
4. «Кавказ» — 25.
5. «Урожай» — 13.
6. «Чэчэнай» — 8.
7. «Адыгэкъал» — 5.
8. «Джаджэ» — 3.