ЦIыфэу щымыIэжьым къыкIэныгъэр къызытефэрэм ар ыштэным пае мэзи 6 пIалъэу хэбзэгъэуцугъэм къыреты. Арэу щытми, игъо имыфэхэрэр щыIэх.

Зыр Iофыгъо горэм ыгъэохъугъ, адрэм фитыныгъэу иIэр ышIэрэп, ящэнэрэр цIыфэу мылъкур къыфэзгъэнагъэр зэрэщымыIэжьыр къин къыщы­хъугъ, кIэныр ыштэжьыным егупшысагъэп, къызэрэфагъэнагъэм щымыгъуа­зэхэрэри щыIэх.
ПIалъэу законым итхагъэр имыкIызэ кIэныр зымыгъэпсыгъэм хэкIыпIитIу иI:

1. Хьыкумыр Iофым хэмыплъэу ыштэщт.
   Ар зыбгъэфедэн плъэкIыщтыр ощ нэмыкIэу кIэныр къызфэнагъэхэм ар игъом агъэпсыгъэу, ори ахэм узэращыщын фаем къыдырагъаштэмэ ары. Нэбгырэ пэпчъ къызэрезэгъырэр къэзыушыхьатырэ письмэр къытхын фае.
   КIэныр къызфэнагъэхэм мызекIорэ мылъкоу къатефагъэм фитыныгъэу фыряIэ хъугъэр арагъэтхыгъэмэ, ар къэзыушыхьатырэ тхылъым (свидетельство о регистрации) кIуачIэ зэримыIэжьыр нотариусым къызитхыкIэ, къэралыгъо регистрацием зэхъокIыныгъэхэр фашIынхэу фитыныгъэ щыIэ мэхъу.
   Ори, ощ нэмыкIэу къызтефагъэхэми игъом шъумыштагъэмэ, ащ хьыкумыр хэплъэн фаеу хъущт.
2. Хьыкумым икIэрыкIэу пIалъэ къыуитынэу пшIын плъэкIыщт.
   КIэныр къызфэнагъэр ащ щымыгъозагъэмэ е Iофыгъоу зыгъэохъугъэр къыушыхьатыжьышъугъэу, ар ушъхьагъу икъукIэ хьыкумым ылъытагъэмэ, тхылъхэр ыгъэпсынхэу джыри зэ фитыныгъэ къыритыжьыщт. Ау «наследникым» ушъхьагъоу иIагъэр зытекIыгъэм ыуж мэзи 6 темышIэзэ хьыкумым зыфигъэ­зэн фае. Ащ пае тхылъэу ыгъэхьазырыщтхэр УФ-м играждан Кодекс ия 132-рэ статья ит.

КIэныр къызфэнагъэм ыштэжьыгъэу хьыкумым зырихъухьэкIэ, зэкIэ ар къызтефагъэхэм яIахьхэр къыгъэнэфэнхэ фае.
— КIэныр къызтефагъэхэм аштэжьыгъэу хьыкумым зырихъухьэкIэ, ар къэзыушыхьатырэ тхылъыр нотариусым къытын ищыкIэгъэжьэп. Хьыкумым рихъухьагъэм кIуачIэ иIэ зэрэхъугъэм къыпкъырыкIхэзэ, къэралыгъо регистрациер ащ фэгъэзэгъэ къулыкъум ыгъэпсыщт, — къыIуагъ Росреестрэм и ГъэIорышIапIэу АР-м щыIэм испециалист-экспертэу Боджэкъо Асыет.