Адыгэ Республикэм хэгъэгу кIоцI IофхэмкIэ и Министерствэ цIыфхэм агу къегъэкIыжьы Интернет-сайтхэм гъэпцIэн Iофхэр бэрэ зэращызэрахьэхэрэр. ПэIудзыгъэ шIыкIэм тетэу анахьэу зэрагъэделэхэрэр Интернет-тучанхэмкIэ ары.

ЗэкъодзакIом щакIо фэдэу закъыщигъэхъузэ, осэ пыутхэм щэфакIохэр арегъэнэцIы, нэмыкIхэм ямэкъэгъэIухэр ежь иеу къашIуегъэшIы.
Товар пыут Интернет-тучаным къыщызыгъотыгъэ щэфакIор щакIом фытео. ЗэкъодзакIом джэуап ащ къыретыжьы цIыфыбэ къежэ фэдэу ыкIи товарым тефэрэ ахъщэм щыщ пэшIорыгъэшъэу икартэ къыригъэхьанэу къыгурегъаIо. Ащ имурад къызыдэхъукIэ зегъэбылъы­жьы, щакIор сыд фэдизрэ фытеуагъэкIи, нахьыбэрэ телефоныр къыштэжьырэп.
НэмыкI шIыкIэкIи цIыфхэр агъапцIэхэу мэхъу. ЩакIо фэдэу закъыщызыгъэхъу­рэм нэмыкI къалэ щыIэу щэфакIом реIо. А къалэм къэкIонэу ыкIи товарыр ышъхьэ­кIэ къыIэкIигъэхьанэу ар зэрэхьазырыр щэфакIом ышIошъ егъэхъу. Ау товарыр ыщэфынэу зэрэтыриубытагъэр къыгъэшъыпкъэжьэу уасэм щыщ икартэ къыфыригъэхьанэу къыгурегъаIо.
Сатыу платформэм щыщэу пэшIорыгъэшъэу уасэм щыщ аIызыхырэр гъэпцIакIоу къычIэкIын зэрилъэкIыщтыр зыщышъумыгъэгъупш.
Джащ фэдэу зэкъодзакIохэм нэмыкI къалэ щыIэхэу, товархэр къаIэкIэзыгъэ­хьэрэ къулыкъу горэмкIэ къэшъущэфы шъушIоигъо пкъыгъор къышъулъагъэIэсыным фэхьазырхэу къышъуаIон, шъу­лъэкъуацIэ, шъуцIэ, шъуятацIэ, шъузщыпсэурэ чIыпIэм, шъуителефон номер къакIэупчIэнхэ, товархэр аIэкIэзгъэхьэрэ къулыкъу горэм исайт нэпцI къышъуфагъэхьын алъэкIыщт.
Адыгэ Республикэм хэгъэгу кIоцI IофхэмкIэ и Министерствэ цIыфхэм агу къегъэкIыжьы Интернет-тучанхэм ащыщафэ зышIоигъохэр зэкъодзакIохэм амыгъэпцIэнхэм пае алъэкъуацIэ, ацIэ, ятацIэ, якартэ иномер, CVV-кодыр, яэлек­трон почтэ, парольхэр араIо, товарыр къаIэкIэмыхьэу ащ ыуасэ аты зэрэмыхъущтыр.
Шъуимылъку зыгорэкIэ зэкъодзакIохэм заIэкIахьэкIэ, псынкIэу телефонэу 02-мкIэ е 102-мкIэ полицием шъуфытеу.
Адыгэ Республикэм хэгъэгу кIоцI IофхэмкIэ и Министерствэ къэбархэмкIэ ыкIи общественнэ зэпхыныгъэхэмкIэ иотдел