АР-м и ЛIышъхьэу КъумпIыл Мурат Мыекъуапэ икъохьэпIэ лъэныкъо щагъэкIэжьырэ гъогум дэжь щыкIогъэ дэкIыгъо зэIукIэр зэрищагъ.

IофшIэнхэр зыфытегъэпсыхьагъэхэр микрорайоныкIэ агъэпсы зыхъукIэ, гъогу- транспорт инфраструктурэм нахь зегъэ­ушъомбгъугъэныр, нахьышIум ылъэныкъо­кIэ къалэм итеплъэ зэхъокIыныгъэ­хэр фэшIыгъэнхэр ары.
ЗэIукIэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ, Мыекъуа­пэ имэрие, подряднэ, ресурсхэр къаIэкIэзыгъэхьэрэ организациехэм ялIыкIохэр. ШышъхьэIум рагъэжьэгъэ, илъэсым ыкIэ­хэм яхъулIэу аухынэу щыт IофшIэнхэр зэрэкIорэм тегущыIагъэх. Гъогум игъэ­кIэжьын пае сомэ миллиони 100 фэдиз къыхагъэкIыгъ.
Павловым иурам къыщежьэу Мыекъуа­пэ къэзыухьэрэ автомобиль гъогум нэсэу урамэу Степноим изы Iахьэу километрэ фэдиз хъурэр агъэкIэжьы. ШъолъыритIум ычIыпIэкIэ мыщ гъогу шъолъыри 4 щагъэпсыщт, къутырэу Гавердовскэм изэпырыкIыпIэ еолIэрэ дэкIыпIэм я 5-рэ шъолъырыр щашIыщт. Урамэу Степноимрэ Остапенкэм иурамрэ зыщызэуалIэхэрэм дэжь нэфрыгъуазэ щагъэуцущт.
КъумпIыл Мурат IофшIэнхэр зэрэкIорэм зыщигъэгъозагъ. Гъогухэр нахь шъуамбгъо хъунхэм пае инженер коммуникациехэр нэмыкI чIыпIэхэм ахьыгъэх, остыгъэхэр зыпалъэщт пкъэухэр агъэуцугъэх, автомобиль гъогумрэ лъэсгъогухэмрэ язэтегъэпсыхьан ыуж итых.
АР-м и ЛIышъхьэ пшъэрылъ афи­шIыгъ IофшIэнхэр зэкIэ игъом ыкIи дэгъоу агъэцэкIэнхэу, гъогушIынымкIэ джырэ уахътэм диштэрэ шапхъэхэр агъэфедэнхэу, щынэгъончъагъэмкIэ амалхэр зэра­хьанхэу, чъыгхэмрэ куандэхэмрэ гъогу напцэхэм аIуагъэтIысхьанхэу. КъумпIыл Мурат зэрэхигъэунэфыкIыгъэмкIэ, Iофэу агъэцэкIэщт пстэури зыфэкIожьын фаер тхьамыкIагъохэр нахь макIэу гъогум техъухьанхэр, мы чIыпIэр щынэгъончъэу щытыныр ары.

«Мы гъогу Iахьыр къалэм идэхьапIэхэм зэу ащыщ. Тэ пшъэрылъэу тиIэр джырэ шапхъэхэм ар ади­штэнымкIэ, водительхэмкIи, лъэс­рыкIохэмкIи Iэрыфэгъоу, щынэ­гъончъэу щытынымкIэ ищыкIэгъэ пстэури тшIэныр ары. МикрорайоныкIэм псынкIэу унэхэр зэрэщашIыхэрэм, къутырэу Гавердовскэм зызэриушъомбгъурэм, цIыф­хэм япсауныгъэ зыщагъэпытэрэ физкультурэ комплексэу «Ошъутенэмрэ» мылылъэмрэ якIуалIэ­хэрэр нахьыбэ зэрэхъурэм япхы­гъэу мы гъогу Iахьым изытет нахь лъэшэу тылъыплъэн фаеу мэхъу», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.