Дунэе Адыгэ Хасэм изэфэхьысыжь-хэдзын зэфэс непэ къалэу Налщык щыкlуагъ.

ДАХ-м джырэ уахътэм Хэсэ 14 хэхьэ. Ахэр Урысыем ыкlи lэкlыб къэралыгъо­хэм ащылэжьэрэ хасэх. Дунэе Адыгэ Хасэм изэфэс хэлэжьагъэх КъБР-м и Лlышъхьэу Кlокlо Казбек, УФ-м и Президент хэгъэгу кlоцl политикэмкlэ и Гъэlорышlапlэ лъэпкъ политикэмкlэ идепартамент ипащэу Татьяна Вагинар, АР-м, КъБР-м ыкlи КъЧР-м янароднэ тхакlоу Мэщбэшlэ Исхьакъ.
Урысыем и Президентэу Владимир Путиным ДАХ-м иконгресс къыфигъэ­хьыгъэ шlуфэс тхылъым Татьяна Вагинар къеджагъ. Адыгабзэр, шэн-хабзэхэр, тарихъыр къэухъумэгъэнхэм пае ДАХ-м lофышхо зэригъэцакlэрэм ащ игугъу къышlыгъ. АР-м и Лlышъхьэу Къумпlыл Мурат ыцlэкlэ зэфэсым хэлажьэхэрэм шlуфэс арихыгъ лъэпкъ lофхэмкlэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкlэ ыкlи къэбар жъугъэм иамалхэмкlэ АР-м и Комитет ипащэу Шъхьэлэхъо Аскэр.
Адыгеим илlыкlоу нэбгыри 10 ДАХ-м изэфэс хэлажьэ. Мыр зэфэхьысыжь закъоп, хэдзынхэри ащ щызэхащагъэх. Хэсэ тхьаматэм ипlалъэ ыухыгъ. Дунэе Адыгэ Хасэм итхьэматэ илъэси 3 уахътэ­кlэ хадзы. Аужырэ илъэс 12-м ДАХ-м итхьэмэтагъэу Сэхъурэкъо Хьаутий икандидатурэ къагъэлъэгъуагъ ыкlи ар Дунэе Адыгэ Хасэм итхьаматэу конгрессым къекlолlагъэхэм хадзыжьыгъ. Джащ фэдэу ащ игуадзэхэри, и Советрэ игъэцэ­кlэкlо купрэ ахэтыщтхэри агъэнэфагъэх.
lоныгъом и 20-м адыгэм и Мафэ КъБР-м щыхагъэунэфыкlы. Конгрессым къыкlэлъыкlоу ащ къекlолlагъэхэр зэкIэ мэфэкl зэхахьэхэм арагъэблэгъагъэх.
ГъукIэлI Сусанн.