Ныбжьэгъу лъапIэхэ!

ИлъэсипщI хъуауэ фокIадэм и 20-м догъэлъапIэ Адыгэхэм (шэрджэсхэм) я дунейпсо махуэр. А ма­хуэр 2014 гъэм КъБР-м и Iэтащхьэм и унафэкIэ ягъэуващ икIи ар зыгъэпсэхугъуэ махуэу къащтащ.
Адыгэхэм (шэрджэсхэм) я дунейпсо махуэщIыр махуэгъэпсым зэрыхэувэрэ куэд щIакъым, ауэ дэ ди тхыдэр лъэхъэнэ жыжьэм къыщожьэ икIи ар хуабжьу куущ, убгъуащ, къулейщ. Урысей къэралыгъуэм, дунейпсо цIыхубэ зыужьыныгъэм хэлъхьэныгъэ ин хуэзыщIа лъэпкъхэм ящыщщ адыгэхэр.
Дунейпсом цIэрыIуэ щыхъуа щIэныгъэлIхэм, тхакIуэ­хэм, сурэтыщI Iэзэхэм, лIыхъужьхэм ди лъэпкъым и цIэр лъагэу яIэтащ.
Хамэ щIыпIэхэм щыпсэу адыгэхэм яхузэфIокI я бзэр, адыгагъэр, лъэпкъ хабзэхэр, щэнхабзэ фIыгъуэхэр яхъумэжыну.
ДяпэкIи, лъэпкъ тхыдэм хыхьэу къызэднэкIа напэ­кIуэцI гузэвэгъуэхэр зыщыдмыгъэгъупщэу, дунейр мытыншми, щIэблэр лъэпкъым, къэралым иригушхуэу, игъэлъапIэу къэдгъэхъуну ди къалэнщ дэтхэнэ зыми.
Дунейпсо Адыгэ Хасэм и ГъэзэщIакIуэ гупым хэтхэм я цIэкIэ, си щхьэкIэ сэ къызбгъэдэкIыу сывохъуэхъу Адыгэм ди махуэщIымкIэ. Унагъуэ къэс узыншагъэ быдэ, мамырыгъэ, ехъулIэныгъэ, насып диIэну! Ди пщэдейм папщIэ псэзэпылъхьэпIэ ит ди щIалэхэр хэщI димыIэу, узыншэу къекIуэлIэжыну Тхьэм жиIэ.
ИрефIакIуэ адыгэ (шэрджэс) лъэпкъыр, Къэбэрдей­Балъкъэрым щыпсэу цIыху псори. Иребыдэ лъэпкъыбэу зэхэс ди Хэкушхуэр, зэгурыIуэныгъэмрэ мымырыгъэмрэ щытепщэу.
Сэхъурокъуэ Хьэутий.
Дунейпсо Адыгэ Хасэм и тхьэмадэ.