Лъэпкъым и пщIэр къэзыIэт, фIыкIэ зи цIэр зыгъэIуа дэтхэнэ зыри лъэпкъым и набдзэщ. ЗэрыжаIэу, апхуэдэр яIэт, я напщIэми телъщ. Ауэ щыхъукIи, пасэрейм щыгъуэ, Iуэху мыщхьэпэ зылэжьа, зэран гуэр зыщIа цIыхум щхьэкIэ хэтхэ ящыщ, жаIэу щытащ, ар къызыхэкIа лъэпкъыр ягъэпудын, гъэсэныгъэ тэмэм абы хэзымылъхьэфахэм я пщIэр ягъэлъэхъшэн мурадкIэ. Мыдрейуэ, лIыгъэ, хахуагъэ зезыхьар зи къуэм щIэупщIэу щытащ, абы хьэл-щэн дахэ хэзылъхьахэр къыхагъэщхьэхукIын, абы и цIэр фIыкIэ къраIуэн папщIэ.

Нобэ зи гугъу фхуэтщIыну Джэданэхэ Залымрэ Алимрэ къэзылъхуахэм я щхьэр лъагэу ирагъэлъагъужащ, жытIэми дыщыуэнукъым. Апхуэдэ бын зиIэм я насыпщ, жыхуаIэм хуэдэхэщ. Нэхъыжьхэм я гугъуехьхэр пщIэншэ ямыщIу, я гъащIэ гъуэгуу къыхаха спортым и лъагапIэм тIури ихьэфащ икIи я зэфIэкIхэр зэрылъа­гэр щIыпIэ куэдым щагъэлъэгъуащ. ЗэкъуэшитIым УФ-ми, дунейпсо зэхьэзэхуэшхуэхэми мызэ-мытIэу япэ увыпIэхэр къыщахьащ, етIуанэ, ещанэ щыхъуахэри къыхэкIащ.
Зэшхэм я нэхъыжь Залым Урысей Федерацэм самбэмкIэ дунейпсо классымкIэ спортым и мастерщ, УФ-м щIыхь зиIэ и тренерщ. Алимщи, УФ-м дзюдомкIэ спортым щIыхь зиIэ и мастерщ, Пекин щекIуэкIа Олимп джэгухэм хэтащ. КIэщIу жытIэмэ, зэкъуэшитIым медалрэ кубокыу къахьахэр къедбжэкIын щIэддзэмэ, ди зэманри кIуэнщи, мы тхыгъэр къыщIедгъэжьа хъыджэбз цIыкIум дежи дынэмысынкIэ хъунщ.
АтIэ, къалэмыр мызыгъуэгукIэ къыщ­IэтщтамкIэ дгъэзэжынщи, ди гуапэу къыхэдгъэщынщ Джэданэхэ зэкъуэшитIым спортым щыпхраша лъагъуэм пищэу, Алим ипхъу цIыкIу Алинэ иджыблагъэ утыкум къызэрихьар. Абы хузэфIэкIащ Урысей Федерацэм и еджакIуэхэм дзюдомкIэ я 7-нэ гъэмахуэ спартакиадэу Краснодар крайм и Армавир къалэм тхьэмахуитI ипэкIэ щекIуэкIам япэ увыпIэр къыщихьын. А зэпеуэм хэтащ къэралым и щIыналъэхэм ящыщу 79-м я цIыхубз ныбжьыщIэу 320-м нэблагъэ, я ныбжькIэ илъэс 18-м щIимыгъуауэ.
Фигу къэдгъэкIыжынщи, килограмм 40 зи хьэлъагъхэм я деж зыкъыщызыгъэлъагъуэ адыгэ пщащэм абы щыгъуэ зэIущIитху иригъэкIуэкIати, кIэух зэпе­уэри хэту, плIым щытекIуащ, зэхьэзэхуэ­хэм хухаха зэманхэр и кIэм нимыгъэсу, и IэзагъкIэ и хьэрхуэрэгъухэм фIыуэ зэрефIэкIыр нэрылъагъуу. Апхуэдэ щIыкIэкIэ, Алинэ и япэ лъагапIэшхуэр спортым къыщищтащ — УФ-м и еджакIуэхэм я Спартакиадэм и дыщэ медалыр къи­хьащ.
ЗэрыжаIэу, Алинэ зэфэну псыр иджыри къэжакъым, и ныбжьыр илъэс I5 хъууэ аращ. Мэзкуу щопсэу, курыт еджа­пIэм щIэсщ. Алинэ и адэ къуэш икIи и тренер Залым иджыблагъэ къызэрыджиIамкIэ, хъыджэбз цIыкIум и гур дзюдом хуитхьэщIыкIыпащ икIи нэгъуэщI гуэрым зыхуигъэхьэзырыну е IэщIагъэ ищIыну игу къэкIыххэркъым. Абы къалэнышхуэ зыхуигъэувыжащ, зэрыхузэфIэкIкIэ спортым и лъагапIэ нэхъ ин дыдэхэм нэсыну.
Алинэ и мурадхэм гушыIэ зэрыхэмылъым мыри и щыхьэтщ: илъэситху фIэкIа и ныбжьыр мыхъуауэ художественнэ гимнастикэм иратын мурадкIэ и адэ-анэм ар секцэм щашам, абыхэм къаIущIар дуней псом щыцIэрыIуэ тренер Винер Иринэт. А махуэм абы и деж кърашэлIа сабий минитIым щIигъум цIыхуищ къудейт зыдэлэжьэну къыхи­хари, а щым Алинэ яхэхуат. Ауэ, адэ-анэм сыт ямыщIами, хъыджэбз цIыкIур гимнастикэм яхуэкIуакъым, дзюдом фIэкIа нэгъуэщI сыхуейкъым жиIэри.
Мис апхуэдэ хъыджэбз щыпкъэ Джэданэхэ къахуохъу, и мурадыр дахэрэ и гуращэхэр нэхуу. ЗыщIэхъуэпсу хъуар Тхьэм къригъэхъулIэ, и текIуэныгъэ куэдми дыщигъэгуфIыкI.
ХЬЭЩЫКЪУЕЙ Олег.