ФутболымкIэ республикэ зэнэкъокъоу къуаджэу Хьакурынэхьаблэ щыкIуагъэм ныбжьыкIэхэр хэлэжьагъэх.

Район командэу «Нартым» изэхэщакIоу, общественнэ Iоф­шIэным сыдигъуи чанэу хэлажьэщтыгъэ ыкIи спортыр зыгу рихьыщтыгъэ Боджэкъо Борис Къэплъан ыкъом ишIэжь фэгъэ­хьыгъэ турнирым Шэуджэн ыкIи Джэджэ районхэм якоманди 6-мэ зыщаушэтыгъ. Спортсменхэм илъэс 13 – 14 аныбжь.
Iофтхьабзэм кIэщакIо фэхъу­гъэх АР-м физическэ культурэмкIэ ыкIи спортымкIэ и Комитетрэ мыщ иотделэу Шэуджэн районым щыIэмрэ. Зэнэкъокъур рамыгъажьэзэ къэзэрэугъоигъэхэм закъы­фигъэзагъ Борис ишъэогъоу, командэу «Нартым» иветеранэу Абдул Юсуфовым. КIэлэцIыкIу футболым хэхъоныгъэ ышIынымкIэ, псауныгъэр гъэпытэгъэ­нымкIэ мыщ фэдэ турнирхэм язэхэщэн мэхьанэшхо зэриIэр, ащ дакIоу къыткIэхъухьэрэ лIэужхэм яхэгъэгу шIу алъэгъоу пIугъэнхэм ахэр зэрэфэIорышIэхэрэр ащ хигъэунэфы­кIыгъ. Футболист ныбжьыкIэхэм гъэхъэгъэшIухэр ашIынхэу къафэ­лъэIуагъ.
Къуаджэу Пщыжъхьаблэ икомандэ турнирым текIоныгъэр къыщыдихыгъ. ЯтIонэрэ чIыпIэр ыубытыгъ Шэуджэн районым икIэлэцIыкIу-ныбжьыкIэ спорт еджапIэ, Мамхыгъэ илIыкIохэр ящэнэрэх. ХагъэунэфыкIырэ чIыпIэхэр къыдэзыхыгъэхэм щытхъу тхылъхэр, медальхэр ыкIи кубокхэр афагъэшъошагъэх.