ФутболымкIэ Адыгэ Республикэм и Кубок икъыдэхын фэгъэхьыгъэ финал ешIэгъур зыщыкIощт мафэр къэнэфагъ. Хабзэ зэрэхъугъэу, ар республикэ стадионэу «Зэкъошныгъэм» щырагъэкIокIыщт.

АР-м и Къэралыгъо Совет – Хасэм ишIухьафтын фэбэнэщтых командэхэу «Кавказ Адэмый» (Красногвардейскэ район) ыкIи «Асбир» (Адыгэкъал).
Красногвардейцэхэм Адыгеим ичемпионат текIоныгъэр къыщыдахыгъ, джыри ягъэхъагъэхэм ахагъэхъон алъэкIыщт. Ау Адыгэкъалэ икоманди ешIэкIэ дахэ къегъэлъагъо, пчъагъэрэ чемпион хъугъэ «Урожаир» зэнэкъо­къум хигъэзын ылъэкIыгъ.
ЗэрагъэнэфагъэмкIэ, финал зэIукIэгъур чъэпыогъум и 5-м сыхьатыр 3-м щыIэщт. Футболыр зыгу рихьыхэрэр ащ еплъынхэу зэхэщакIохэм рагъэблагъэх.