Лъэпкъ проектэу «ПсэупIэр ыкIи къэлэ щыIакIэр» зыфи­Iо­рэм ипхырыщын пае аштэгъэ федеральнэ проектэу «Псы къабзэм» къыдыхэлъытагъэу, Тэхъутэмыкъое районым ит поселкэу Отраднэм щырагъэжьэгъэ псыкъычIэщыпIэм ишIын гъунэм рафылIагъ.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, процент 90-р хагъэкIыгъах. Псэуалъэм ипроект къыдыхэлъытагъэу, псыр къызчIащырэ чIыпIэхэр кIэу аубырыугъэх, гурытымкIэ лъытагъэу, метрэ 200 фэдиз ащ якууагъ. КъычIэщыпIэм сыхьатым псы кубометрэ 25 — 30 къы­тыщт. Башнеу агъэуцугъэри нахь ин. НахьыпэкIэ кубометрэ 25-м телъытэ­гъагъ, джы кубометрэ 50 ифэщт. Псыр зыгъэ­къэбзэщт системэр агъэпсыгъ, чIыпIэу зэлъиубытырэр къашIыхьажьыгъ, зэты­рагъэпсы­хьажьынэу ары къэнагъэр.
ЗэкIэмкIи псыкъычIэщыпIэм ишIын сомэ миллион 22,8-рэ пэIуагъэхьагъ. Мыщ фэдиз гъунэгъу къуаджэу Нэты­хъуае щагъэуцурэ къычIэщыпIэри.

«Псы къабз» зыфиIорэ лъэпкъ проектым къыдыхэлъытагъэу, блэкIыгъэ илъэ­сым Тэхъутэмыкъое районым псэолъи 8 щагъэкIэжьыгъ. Ахэм ащыщэу 5-р къуаджэу Козэт, 3-р Тэхъутэмыкъуае адэт. ЗэкIэмкIи ахэм сомэ миллиони 141-рэ апэIухьагъ.
Шъугу къэдгъэкIыжьын, псыр цIыфхэм аIэкIэзгъэхьэрэ системэр гъэкIэжьыгъэным республикэр лъэшэу пылъ. Лъэпкъ проектыр затIупщыгъэ 2019-рэ илъэсым къыщыублагъэу псым епхыгъэу псэолъэ 27-рэ Адыгеим имуниципальнэ образованиехэм ащашIыгъ е ащагъэкIэжьыгъ. Ахэм ащыщэу 13-р гъэрекIо атIупщыгъ. Ахэм зэкIэмкIи сомэ миллион 308-рэ апэIухьагъ.
Мы илъэсым псэолъи 6 рагъэжьагъ. Ахэм зэкIэмкIи сомэ миллиони 162-у атефэщтым щыщэу сомэ миллиони 143,3-р федеральнэ бюджетым къыхэхыгъ. Псэуалъэхэм анахьыбэм процент 80-м къы­щымыкIэу IофшIэнхэр ащызэшIуахыгъах.
ХЪУТ Нэфсэт.
Сурэтыр: Iэшъынэ Аслъан.