Iоныгъом и 18-м Урысыем ит гъэсэныгъэм иучреждениехэм зэкIэми федеральнэ программэу «Обучение служением» зыфиIорэр къащызэIуахыгъ. Урысые Федерацием и Президент игукъэкIыкIэ ар зэхащагъ.

Мыекъопэ къэралыгъо технологическэ университетми мы мафэр мэфэкI шIыкIэм тетэу щыкIуагъ. ГъэрекIо апэрэу федеральнэ программэр апшъэрэ еджапIэм щаушэтыгъ. Мыгъэ джы нахь игъэ­кIоты­гъэу хэлэжьэнэу агъэнафэ.
Апшъэрэ еджапIэм щылэжьэрэ кIэлэегъаджэхэр, студентхэр, сатыум емыпхыгъэ организациехэм ялIыкIохэр, нэмыкI­хэри Iофтхьабзэм хэлэжьагъэх.
Зэхахьэр лъэныкъо зэфэшъхьафхэмкIэ гощыгъэу кIуагъэ, хьакIэу къекIолIагъэхэм ягущыIэхэм ауж проектнэ мастерскоим иIофшIэн ыублагъ. Социальнэ гумэкIыгъо зэфэшъхьафхэм япхыгъэу студентхэм япроектхэр къагъэлъэгъуагъэх.
— Федеральнэ проектым тиапшъэрэ еджапIэ зэрэхэлажьэрэм мэхьанэшхо иI. СтудентхэмкIэ ащ шIогъэ гъэнэфагъэ пылъ. Шъхьадж зыфеджэрэ лъэныкъом елъытыгъэу социальнэ гумэкIыгъохэм язэшIохын ныбжьыкIэхэр хэщэгъэнхэр, волонтер ыкIи IэпыIэгъу закъоу щымытхэу ахэр дэгъэзыжьыгъэнхэм фэIоры­шIэрэ проектхэр агъэхьазырынхэр, ахэр щыIэныгъэм щыпхыращыжьынхэр ары пшъэрылъ шъхьаIэу зэхэщакIохэм зыфагъэуцужьырэр, — къыIуагъ федеральнэ программэм ишъолъыр кураторэу Чыржьын Светланэ.
Iофтхьабзэм къыдыхэлъытагъэу социальнэ пшъэрылъхэмкIэ ермэлыкъыр нэужым зэхащагъ. Общественнэ мэхьанэ зиIэ гумэкIыгъохэр ащ къыщагъэнэфа­гъэх, ахэм язэшIохынкIэ ящыкIагъэр къаIуагъ. Студентхэм гъэсакIохэр ягъу­сэхэу проектнэ командэхэр зэхащагъэх. Амалэу яIэм елъытыгъэу илъэсыкIэ еджэгъум ахэр зэшIуахыщтых.

Iофтхьабзэм къекIолIагъэхэм шIуфэс къарихыгъ апшъэрэ еджапIэм ипроректорэу Людмила Задорожнаям. Федеральнэ программэу «Обучение служением» зыфиIорэр апшъэрэ еджапIэм зэрифэшъуашэу щызэхащэнымкIэ къатефэрэр зэкIэ зэрагъэцакIэрэр ащ къыхигъэщыгъ. Ащ ишIуагъэкIэ студентхэм нахь шIэныгъэ куу яIэ зэрэхъурэр, шъолъырым щызэшIуахырэ Iофыгъохэм нахь апэблагъэ зэрэхъухэрэр хигъэунэфыкIыгъ.
Мыекъопэ къэралыгъо технологическэ университетым иэкологическэ факультет мэшIогъэкIосэ IофымкIэ сэнэхьат щызэзыгъэгъотырэ Вероника Кияшкинам иквалификационнэ IофшIэн шIуагъэ къы­тыщт. Общественнэ проектым фэдэу ар ыгъэпсыгъ. Зымылъэгъухэрэр ыкIи хьафизэхэр машIом щыухъумэгъэнхэм фэшI инклюзивнэ мэкъэгъэIоу яIэн фаехэр ащ зэхифыгъэх ыкIи хэушъхьафыкIыгъэ тхылъ цIыкIу, кIэлэцIыкIухэм нахь агу рихьырэ лъэныкъохэр къыдилъытэзэ, зэхигъэу­цуагъ. Ащ фэгъэхьыгъэ IофшIэныр зэрэзэшIуихыгъэр пшъэшъэжъыем къытфиIо- ­тагъ.
ГъэрекIо, федеральнэ программэм изэфэхьысыжьэу, социальнэ проектхэмкIэ зэнэкъокъур зэфашIыжьыгъ. Проектэу къырахьылIагъэхэм ащыщхэр урысые уцугъоми зэрифэшъуашэу къыщагъэлъэгъуагъэх.
ДЕЛЭКЪО Анет.
Сурэтхэр: Iэшъынэ Аслъан.