Урысые Iофтхьабзэу «Кросс нации – 2024» зыфиIорэр Iоныгъом и 21-м рагъэжьэщт. Мыр 2004-рэ илъэсым щыублагъэу къэралыгъом ишъолъырхэм зэкIэм ащэкIо.

Лъэпкъ проектэу «Демографием» ифедеральнэ проектэу «Спортыр щыIэныгъэм ишапхъ» зыфиIорэм къыдыхэлъытагъэу рагъэкIокIырэ Iофтхьабзэм цIыфыбэ хэлажьэ. Зы километрэм щегъэжьагъэу 12-м нэс къэзычъы зышIоигъохэм ятхын Iоныгъом и 20-м нэс кIощт. Ащ пае къэралыгъо фэIо-фашIэхэм япортал къыщызэIухыгъэ унэе кабинетым иамалхэр хэти къызфигъэфедэн ылъэкIыщт. Ащ шъузщыпсэурэ шъолъырыр ыкIи шъукъызэкIо­лIэщт чIыпIэр ишъутхэн фае. Мые­къуапэкIэ ар зыщырагъэ­кIокIыщт республикэ стадионэу «Зэкъошныгъэм» испорт еджапIэу N 1-м пчэдыжьым сыхьатыр 9-м щегъэ­жьагъэу мафэм 4-м нэс зыщы­шъутхын шъулъэкIыщт.

ЦIыфым ипсауныгъэ изытет шапхъэхэм зэрадиштэрэр зэрытхэгъэ тхьапэр зыIэкIэлъхэм зэ­кIэм Iофтхьабзэм зыщаушэтын амал яIэщт. Ори, уисабыйи ащ хэптхэнхэ плъэкIыщт.
ХагъэунэфыкIырэ чIыпIэхэр къыдэзыхыгъэхэм медальхэр ыкIи дипломхэр афагъэшъошэщтых.