Тэхъутэмыкъуае дэт культурэм и Унэ АдыгеимкIэ анахь пэрытхэм ахалъытэ. Чылэм щыпсэухэрэр мыщ зэфещэх, ныбжь зэфэшъхьаф зиIэхэм якIуапI. Къуаджэм дэсхэм языгъэпсэфыгъо уахътэ гъэшIэгъонэу агъэкIоным, кIэлэцIыкIухэм лъэныкъо зэфэшъхьафхэмкIэ ясэнаущыгъэ къызэIуахыным фэIорышIэ. А пшъэрылъыр АР-м и ЛIышъхьэу КъумпIыл Мурат къыгъэуцухэрэм ащыщ.

Тэхъутэмыкъое районыр загъэпсы­гъэр илъэси 100 зэрэхъурэм ипэгъокIэу Iоф­тхьабзэу зэхащэщтхэр къытфиIотагъ муниципалитетым культурэмкIэ игъэIорышIапIэ ипащэу Хьатит Нурдин:
— 2024-рэ илъэсым Тэхъутэмыкъое районыр зызэхащагъэр илъэси 100 мэхъу. Ащ ихэгъэунэфыкIын мэхьанэшхо етэты.
Iофтхьабзэр зэрифэшъуашэу зэхэщэгъэным, районым исхэмкIи, хьакIэхэмкIи ар мэфэкI шъыпкъэ хъуным амалэу тиIэр етхьылIагъ.
ЗэхэщэкIо комитетым изэхэсыгъо унашъоу щаштагъэмкIэ Iоф­тхьэбзэ шъхьа­Iэхэр Iоныгъом и 21 — 28-м зэхащэщтых. Ахэр Тэхъутэмыкъуае ичIыпIитIумэ ащыкIощт — шыгъэ­чъапIэу «Щагъди» зыфиIорэмрэ культурэм и Унэ ыпашъхьэ ит пчэгумрэ. Программэм къыдыхэлъытагъэу спорт, чэфыгъо тематическэ Iофтхьэбзэ зэфэшъ­хьафхэр зэрахьэщтых.

Апэрэ мафэм атлетикэ псынкIэмкIэ зэнэкъокъущтых, къызэдэчъэщтых, шыгъачъэ, кIэлэцIыкIухэм апае джэгукIэ зэфэшъхьафхэр зэхащэщт. Джащ фэдэу аниматорхэми ахэр агъэчэфыщтых. ХьакIэхэм апагъохыщтых лъэпкъ Iэпэщысэхэр. Джащ фэдэу мастер-классхэр, флешмобхэр рагъэкIокIыщтых. Тирайонрэ республикэмрэ яколлектив анахь дэгъу­хэм, Адыгеим иартистхэм якъэгъэлъэгъонхэм цIыфхэр яплъынхэ алъэкIыщт.
Iоныгъом и 28-м районым исхэм афэгушIощтых. МэфэкI шIыкIэм тетэу муниципальнэ образованием хэхъоныгъэ ышIыным зиIахьышIу хэлъхэр агъэшIощ­тых. Республикэм иартист цIэрыIохэм концерт къатыщт.
ЗэхэщакIохэм пшъэрылъ шъхьаIэу зыфагъэуцужьыгъэр агъэцэкIэщт. МэфэкIыр шэпхъэшIухэм адиштэу, цIыфхэм агу къинэжьэу зэхэщэгъэным анаIэ тырагъэтыщт. ЦIыфхэм ящынэгъончъагъи янэплъэгъу рагъэкIыщтэп.
Лъэпшъыкъо Фатим.
Сурэтыр авторым ий.