Адыгэ кIэлэегъэджэ колледжыр (училищыр) загъэпсыгъэр илъэcи 100 хъущт къихьащт илъэсым.

Юбилеим ихэгъэунэфыкIын фэгъэхьыгъэ мэфэкI Iофтхьабзэхэм япэублэ хъугъэ мы мафэхэм еджапIэм щызэхащэгъэ зэхахьэр. Ащ къырагъэблэгъа­гъэх Мыекъопэ районым ит гъэсэныгъэм игупчэу N 4-м июнармейцэхэр. Мы учреждением СССР-м и ЛIыхъужъэу Андырхъое Хъусен ыцIэ ехьы.
Iофтхьабзэм ипрограммэ гъэшIэгъо­нэу, узIэпищэу гъэпсыгъагъ. КIэлэеджа­кIохэм колледжыр къаплъыхьагъ, ащ дакIоу тарихъэу пылъыр зэрагъэшIэн, мыщ щеджэгъэ цIыф цIэрыIохэм яшIэжь зэрагъэлъапIэрэр зэхашIэн амал яIагъ. Экскурсием ишIуагъэкIэ колледжым ылъапсэ къызщежьэрэм, лIэшIэгъум къыкIоцI ащ гъэхъагъэу ышIыгъэхэм юнармейцэхэм защагъэгъозэн алъэ-­
кIыгъ.
Мэхьанэшхо зиIэхэм ащыщ еджапIэм щагъэпсыгъэ ЛIыхъужъхэм якъогъупэ. Адыгеим ыкIи колледжым ацIэ рязыгъэ­Iогъэ цIыфхэм афэгъэхьыгъэ къэбархэр мыщ щызэхэугъоягъэх. Ахэм ащыщых СССР-м и ЛIыхъужъхэу Андырхъое Хъусен, Бжыхьэкъо Къымчэрые, Нэхэе Даутэ, Ацумыжъ Айдэмыр, апэрэ адыгэ бзылъфыгъэ летчицэу Бэгъужъэкъо Лелэ, социалистическэ IофшIакIэм и ЛIы­хъужъэу Иван Сединыр.

Колледжым икIэлэегъаджэу Нэгъой Саидэ Андырхъое Хъусен ищыIэныгъэ ыкIи итворческэ гъогу япхыгъэу кIэлэе­джакIохэм къафиIотагъ. Сэнаущыгъэшхо зыхэлъ усакIом адыгэ литературэм ыкIи культурэм хэхъоныгъэ ашIыным иIахьышхо зэрэхэлъыр ащ хигъэунэфыкIыгъ.
Я 2-рэ «Б» курсым ис Хьаджэбыекъо Дианэ Андырхъое Хъусен иусэу «Щэхъу­радж» зыфиIорэм къеджагъ, ар апэрэу 1934-рэ илъэсым къыхаутыгъ. Авторым ыгу илъыр, къыIонэу зыфэягъэр кIэлэе­джакIохэм зэхашIагъ ыкIи зэхашIыкIыгъ.
Джащ фэдэу Андырхъое Хъусен фэгъэхьыгъэ фильмэу «Сэ сыщыIэщт» зыфиIорэм къэзэрэугъоигъэхэр еплъыгъэх. Ащ лIыхъужъныгъэу зэрихьагъэр егъэшIэрэ шIэжьэу тилъэпкъ, тихэгъэгу ятарихъ къызэрэхэнэщтыр, уичIыгу шIу плъэгъун зэрэфаем ищысэшIоу зэрэщытыр ащ къыщиIотыкIыгъ.
ХьакIэ цIыкIухэм колледжым щалъэгъугъэр зэкIэ ашIогъэшIэгъоныгъ, тапэкIи мыщ фэдэ зэIукIэхэм ахэлэжьэнхэм зэрафэхьазырхэр къаIуагъ. Мы мафэр лIэшIэгъу юбилеим ихэгъэунэфыкIын къыдыхэлъытэгъэ Iофтхьабзэхэм япэублэ хъугъэ.
Бэла Рахматулинар.
Адыгэ кIэлэегъэджэ колледжым ипащэ пIуныгъэ IофхэмкIэ игуадз.