АР-м иминистрэхэм я Кабинет ипланернэ зэхэсыгъоу Адыгеим и ЛIышъхьэу КъумпIыл Мурат тхьамэтагъор зыщызэрихьагъэм адыгэ къуаем ия XIII-рэ фестиваль икIэуххэм щатегущыIагъэх.

АР-м мэкъу-мэщымкIэ иминистрэу Къуанэ Анзаур мы IофыгъомкIэ къэгущыIагъ. Адыгэ къуаем имэфэкI Мыекъо­пэ районымкIэ Дахъо гъэхъунэм Iоныгъом и 7 — 8-м щыкIуагъ. МэфитIум нэбгырэ мин 50-м ехъу фестивалым къекIолIагъ. Республикэм икъалэхэм, ирайонхэм агъэпсыгъэ лъэпкъ щагухэр, мастер-классхэр, ермэлыкъхэр, зэнэ­къокъу зэфэшъхьафхэр хьакIэхэм ашIо­гъэ­шIэгъон хъугъэх. Республикэм иартистхэм якъэгъэлъэгъонхэр цIыфхэм агу рихьыгъэх.
Урысыем ирекорд мы мафэм атхыгъ: Iахьзэхэлъ обществэу «Джэджэ щэ заводым» метри 189-рэ зикIыхьэгъэ къое гъэгъугъэ благъэр къыгъэхьазырыгъ.
Фестивалыр дэгъоу зэрэзэхащагъэр республикэм и ЛIышъхьэ къыхигъэщыгъ, министерствэхэм, къулыкъухэм, муниципалитетхэм япащэхэм Iофэу ашIагъэм­кIэ зэрафэразэр къыIуагъ.
«Адыгэ къуаем ия XIII-рэ фестиваль хэлэжьагъэхэми, изэхэща­кIохэми «тхьашъуегъэпсэу» ясIо сшIоигъу. Республикэр зэрыгу­шхорэ адыгэ къуаем имэфэкI шэпхъэшIухэм атетэу зэхащэн фае. Мы лъэныкъомкIэ Iоф­шIэкIэшIу аIэкIэлъ хъугъэ, илъэс къэси ар нахь гъэшIэгъонэу зэхащэ. Хэгъэгум щыщ цIыфыбэ мы мэфэкIым къежэ, тиреспубликэ, ащ икультурэ нэIуасэ зыфашIы­нэу, адыгэ къуаем иIэшIугъэ зэхашIэнэу ахэр Адыгеим къэкIох. Мы лъэныкъомкIэ гъэхъагъэу тиIэхэр, джыри Iоф зыдэтшIэнэу щытхэр зэхэтфынхэ фае къэкIощт фестивалыр нахь гъэшIэгъон хъуным пае», — къы­Iуагъ АР-м и ЛIышъхьэ.