Лъэпкъ проектхэмрэ къэралыгъо программэхэмрэ къадыхэлъытэгъэ Iофтхьабзэхэр 2024-рэ илъэсым Адыгеим зэрэщагъэцакIэхэрэм АР-м иминистрэхэм я Кабинет ипланернэ зэхэсыгъо щытегущыIагъэх. Адыгеим и ЛIышъхьэу КъумпIыл Мурат Iофтхьабзэр зэрищагъ.

АР-м иминистрэхэм я Кабинет и Тхьаматэу КIэрэщэ Анзаур зэхэсыгъом къызэрэщиIуагъэмкIэ, Урысые Федерацием илъэпкъ проектхэмрэ икъэралыгъо программэхэмрэ ягъэцэкIэн пае 2024-рэ илъэсым сомэ миллиард 15,8-м ехъу къыхагъэкIынэу щыт. Ащ щыщэу миллиард 11,2-р федеральнэ бюджетым къыхахы.
А мылъкумкIэ псэолъэ 72-мэ ягъэ­кIэжьын, яшIын, ягъэцэкIэжьын макIо. 2024-рэ илъэсым Iоныгъом и 15-м ехъу­лIэу къатIупщыгъэ мылъкум (сомэ милли­ард 15,4-м) ипроцент 97,4-рэ фэдизымкIэ ары зэзэгъыныгъэ зэрадашIыгъэр. 2024-рэ илъэсым Iоныгъом и 13-м ехъулIэу мылъкум ипроцент 66,3-р ары къызфагъэфедэгъагъэр.
Лъэпкъ проектхэмрэ къэралыгъо программэхэмрэ къадыхэлъытэгъэ псэуалъэхэм ягъэпсынкIэ ыкIи ягъэцэкIэ­жьынкIэ пIалъэхэр аукъохэ зэрэмыхъущтыр республикэм и ЛIышъхьэ къыхигъэщыгъ. Къулыкъухэм, псэупIэхэм япа­щэхэм пшъэрылъ афашIыгъ мыщ фэдэ Iофхэм ренэу гъунэ алъафынэу.
«Федеральнэ пащэхэм, хэгъэгум и Президент яIэпыIэгъу ишIуагъэкIэ джырэ шапхъэхэм адиштэу социальнэ инфраструктурэр зэтедгъэпсыхьанэу, рес­публикэм ис цIыфхэм ящыIэкIэ-псэукIэ нахьышIу тшIынэу амал тиIэ мэхъу. Мыщ фэдэ пшъэрылъым игъэцэкIэнкIэ пшъэ­дэкIыжь нахь къызхэдгъэфэн, бюджетым къыхагъэкIырэ сомэ пэпчъ нахь акъы­лыгъэ хэлъэу дгъэфедэн, Iоф­шIэнхэр игъом ыкIи дэгъоу дгъэцэкIэнхэ фае», — къыIуагъ КъумпIыл Мурат.
Социальнэ мэхьанэ зиIэ псэуалъэхэм яшIынкIэ ыкIи ягъэкIэжьынкIэ лъэныкъо пстэури къызэрэдалъытэн фаер респуб­ликэм и ЛIышъхьэ къыхигъэщыгъ. А зы уахътэм псэуалъэхэм къапэIулъ чIыпIэхэр зэтырагъэпсыхьан, коммуникациехэр агъэкIэжьынхэ, учреждениехэм оборудованиякIэ ачIагъэуцон фае.
«Мы лъэныкъомкIэ щысэ зытетхын тлъэкIыщтхэр тиIэх. Ахэм яIофшIакIэ шъурыгъуаз. Илъэсыбэрэ къашъхьэпэн алъэкIынэу псэуалъэхэр жъугъэпсых», — къыIуагъ АР-м и ЛIышъхьэ.
Лъэпкъ проектхэмрэ къэралыгъо программэхэмрэ къадыхэлъытэгъэ Iоф­тхьабзэхэу 2025-рэ илъэсым агъэцэкIэщтхэмкIэ зэзэгъыныгъэхэр зэрадашIы­хэрэми зэхэсыгъом щедэIугъэх. Псауныгъэм икъэухъумэнкIэ, гъэсэныгъэмкIэ, культурэмкIэ, спортымкIэ, инфраструктурэ псэолъэшIынымкIэ ыкIи нэмыкI лъэныкъохэмкIэ сомэ миллиарди 4-м ехъу зытефэщт Iофтхьэбзэ 52-рэ зэрахьанэу пэшIорыгъэшъэу къырадзагъ.
Адыгеим и ЛIышъхьэ зэрэхигъэунэфыкIыгъэмкIэ, IофшIэнхэр нахьыжьэу аухынхэ, документациер пэшIорыгъэ­шъэу агъэхьазырын ыкIи шъолъырыр къэралы­гъо программэхэмрэ лъэпкъ проектхэмрэ зэрахэлэжьэщт тхылъхэр атынхэ фае.