Адыгеим фэгъэхьыгъэ экспозицие Геническэ краеведческэ музеим къыщызэIухыгъэнымкIэ Адыгэ Республикэм и Лъэпкъ музей методическэ IэпыIэгъу аригъэгъотыгъ. Къэгъэлъэгъоным лъэпкъ шъуа­шэхэр, адыгэ Iанэр, мэкъэмэ Iэмэ-псымэхэр, Адыгеим итамыгъэ­хэр ыкIи нэмыкIхэр щызэрагъэлъэгъунхэ алъэкIыщт.

«Геническэ краеведческэ музеим ипащэхэмрэ иIофышIэхэмрэ Адыгэ Респуб­ликэм и ЛIышъхьэу КъумпIыл Муратрэ Лъэпкъ музеим ипащэу Джыгунэ ФатIимэтрэ лъэшэу афэразэх Адыгеим ишэн-хабзэхэмрэ икультурэрэ къизыIотыкIырэ къэгъэлъэгъоным игъэхьазырынкIэ IэпыIэгъу къызэрэтфэхъугъэхэм фэшI. Адыгеим ичIыопсрэ илъэпкъ шъуашэхэмрэ ядэхагъэ, лъэпкъ мэкъэмэ Iэмэ-псымэхэм яхьалэмэтыгъэ цIыфхэм агу къинэжьынэу сэгугъэ», — къыIуагъ музеим ипащэу Максим Проскурня.
Геническэ краеведческэ музеир 1959-рэ илъэсым къызэIуахыгъ. Краим итарихъ, икультурэ къизыIотыкIырэ экспозиционнэ зали 8 ащ хэт. ГъэрекIо музеим ыгупэ игъэкIэжьынкIэ IэпыIэгъу къафэхъугъэ Адыгэ Республикэм итарихъи джы мыщ нэIуасэ зыщыфашIын алъэкIыщт.