Тэхъутэмыкъое районым ит псэупIэу Инэм IэзэпIакIэу щашIырэр ыкIэм фэкIо, бэ темышIэу ар къызэIуахыщт. Псауныгъэм икъэухъумэнкIэ IэзапIэхэм ягъэкIэжьын епхыгъэ программэм къыдыхэлъытагъэу ар ашIыгъ.

IэзапIэр Инэм дэт сымэджэщым ищагу дагъэуцуагъ, цIыфхэмкIэ ар нахь гупсэфыщт. Квадратнэ метрэ 5135-рэ фэдиз хъурэ псэуалъэр къатищэу зэтет, аужырэ шапхъэхэм адиштэу гъэпсыгъэ.
Социальнэ мэхьанэ зиIэ псэуалъэм ишIын АР-м и ЛIышъхьэу КъумпIыл Мурат апэрэ мафэм къыщегъэжьагъэу ынаIэ тет.
Непэрэ мафэм ехъулIэу IэзапIэм ишIын аухыгъ, джырэкIэ гъэтэрэзыжьын ыкIи зэIухыжьын IофшIэнхэр ары къа­фэнагъэр.
Тэхъутэмыкъое район сымэджэщым иврач шъхьаIэу Нэхэе Светланэ къызэрэтиIуагъэмкIэ, медицинэм ылъэныкъокIэ цIыфхэм яфэIо-фашIэхэр дэгъоу ыкIи игъом зэшIохыгъэ хъунхэмкIэ мы IэзапIэр псэупIэм ищыкIэгъэ дэдагъ.

— Инэм хэхъоныгъэхэр ешIых, цIыфэу щыпсэурэр нахьыбэ мэхъу. IэзапIэу дэтыгъэр зэрэцIыкIум ыпкъ къикIыкIэ лъэныкъо пчъагъэ­хэмкIэ Iэзэгъу языгъэгъотыщт отделениехэр чIыпIэ зэфэшъхьафхэм ащыIагъэх, гущыIэм пае, бзылъфыгъэхэр зэкIуалIэхэрэр, стоматологиер ыкIи нэмыкIхэр IэзэпIэжъым хэтыгъэхэп. Джы зэкIэ зы чIыпIэ хъущт, ащ нэмыкIэу сымэджэщым ищагу псэуа­лъэр зэрэдэтыщтыр цIыфхэмкIэ гупсэфыщт. Зы сменэм нэбгырэ 400-м ехъумэ яфэIо-фашIэхэр медицинэм иIофышIэхэм щагъэцэкIэнхэ алъэкIыщт. Ащ нэмыкIэу, «МРТ эксперт» зыфиIорэр бэджэндэу аштагъэу бэшIагъэу сымэджэщым ищагу дэтыгъ. Джы ари шIокI зимыIэ медицинэ страхованием исистемэ хэхьащт, зищыкIагъэхэм ыпкIэ хэмылъэу ар къафыратхыкIыщт, — еIо тигущыIэгъу.
IэзэпIакIэм ишIын псауныгъэм икъэ­ухъумэн ипэублэ къулыкъу игъэкIэ­жьынкIэ мэхьанэшхо зиIэ лъэбэкъоу щыт.

— Медицинэм хэхъоныгъэхэр зэришIыхэрэм тегъэгушхо. АР-м и ЛIышъхьэу КъумпIыл Мурат, АР-м псауныгъэр къэухъумэгъэнымкIэ иминистрэу Мэрэтыкъо Рустем ащкIэ тафэраз. IэзэпIакIэ тищыкIэгъэ дэдагъ, псэупIэм дэс­хэмкIэ ар къэбар гушIуагъо хъугъэ, къафэмыгъэсыжьэу икъызэIухын ежэх. КъэIогъэн фае, псэолъакIэм ишIын имызакъоу, чIыпIэу къыпэIулъыри зэтегъэпсы­хьагъ, къекIуалIэхэрэм зызыща­гъэпсэфыщт алее дахэ дэт. Джащ фэдэу республикэ бюджетым къы­хэхыгъэ ахъщэмкIэ сымэджэщым ищагу зэрэщытэу электрическэ сетьхэр щызэблахъух, пкъэухэр агъэуцух. Ащ нэмыкIэу сымэджэщым ыкIыби агъэкIэжьыгъ, — еIо Светланэ.
IэзэпIакIэм амалэу къытыщтхэм ащыщ мафэрэ зыщяIэзэщтхэ чIыпIэ яIэ зэрэ­хъущтыр. Ащ сменитIоу Iоф ышIэщт, пIэкIори 10 чIагъэуцонэу агъэнафэ.

Джырэ уахътэм диштэрэ Iэмэ-псымакIэхэр псэолъакIэм чIэтыщтых. ШэпхъакIэхэм атегъэпсыхьэгъэ флюорографиер цифрэ шIыкIэм тетэу, маммографие, рентген зэрашIыщт аппаратхэр кIэу къафащагъэх. Джащ фэдэу УЗИ аппаратхэр, ЭКГ зэрашIыщтыр, холтерхэр яIэщтых. АР-м псауныгъэр къэу­хъумэгъэнымкIэ и Министерствэ къы­тIупщыгъэ ахъщэмкIэ КТ зэрашIыщт аппаратри къащэфыгъ. Мебелэу чIэтыщтыр зэкIэ кIэу къафащагъ. Электроннэ цифрэ шIыкIэм тетэу врачхэм Iоф ашIэщт, ащ ишIуагъэкIэ медицинэ Iэпы­Iэгъоу цIыфхэм агъотырэр нахь псынкIэ, Iэрыфэгъу хъущт.
Мыщ Iоф щызышIэщт IофышIэхэри икъоу яIэх. Район сымэджэщым ипащэ къызэриIуагъэмкIэ, федеральнэ програмэм ишIуагъэкIэ, Iоф зышIэнэу фаеу къяуалIэрэр нахьыбэ хъугъэ. ЫпэкIэ неврологхэр, эндокринологхэр, инфекци­онистхэр имыкъущтыгъэхэмэ, джы икъу фэдизэу врачхэр яIэх. ПсэупIэу нэбгырэ мин 50-м нахь макIэ зыдэсым Iоф щызышIэщтым лэжьапкIэм нэмыкIэу сомэ мин 50 тедзэу, мин 50-м нахьыбэ зыщыпсэурэм сомэ мин 30-м ехъу араты.
IэзапIэр къызызэIуахыкIэ, яIофшIэн къызэрэхэхъощтыр Нэхэе Светланэ кIэухым къытиIуагъ. Амалэу щыIэмкIэ адэбз уз зиIэхэми зыщяIэзэнхэ алъэ­кIыщт чIыпIи агъэпсынэу зэрэрахъу­хьэрэр къыхигъэщыгъ.
ДЕЛЭКЪО Анет.
Сурэтхэр: Iэшъынэ Аслъан.