Физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм итхьамафэ Мыекъуапэ щыкIуагъ. Зэрагъэнэфагъэу, ар мэзищым зэ рагъэкIокIы.

ЗэхэщакIохэм къызэраIуагъэмкIэ, Iофтхьабзэм хэлэжьэнхэу нэбгырэ 80-мэ лъэIу тхылъхэр къатыгъэх, ау зызыушэтыгъэр 75-рэ. Мыщ икIэщакIор Мыекъуа­пэ физическэ культурэмкIэ ыкIи спортымкIэ и Комитет ары. МэфиплIым республикэ стадионэу «Зэкъошныгъэм» шапхъэхэр ща­тыгъэх. Аныбжь елъытыгъэу ащ хэлажьэхэрэм метрэ 1000 ыкIи 3000, джащ фэдэу метрэ 30 ыкIи 60 къачъын фэягъ, нэмыкI лъэныкъохэмкIи яфизическэ ухьазырыныгъэ ауплъэкIугъ.
Зэфэхьысыжьхэм къызэрагъэлъэгъуагъэмкIэ, нэбгырэ 29-мэ шапхъэхэр дэгъу дэдэу атыгъэх, ахэм дышъэ бгъэхалъхьэхэр афагъэшъошагъэх. Тыжьыныр — 22-мэ, джэрзыр — 6-мэ къалэ­жьыгъ. Пшъэрылъыр зымыгъэцэкIагъэр нэбгырэ 16.

Шапхъэхэр зытыгъэхэм яна­хьыбэр кIэлэеджакIох, нахьыжъхэм ащыщэу зызыушэтыгъэр нэбгыри 5.
Физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм изичэзыу тхьамафэ шэкIогъум зэхащэнэу рахъухьагъ.