Адыгэ Республикэм имызакъоу, Краснодар краим икъалэхэу Апшеронскэ, Шытхьалэ, Тимашевскэ ыкIи Лэбапэ, джащ фэдэу Курскэ хэкум къарыкIыгъэхэр зэнэкъокъугъэх. ЗэкIэмкIи нэбгыри 104-рэ хъущтыгъэх.

Адыгэ къэралыгъо университетым физическэ культурэмкIэ ыкIи дзюдомкIэ и Институт испортзал щызэхащэгъэ зэнэкъокъу­хэр гъэшIэгъоныгъэх, спортсменхэм ухьазырыныгъэ дэгъу къагъэ­лъэгъуагъ.
Аныбжь елъытыгъэу кIалэхэр ыкIи пшъашъэхэр купи 4-у агощыгъагъэх. Адыгеим илIыкIохэм медали 5 къахьыгъ. ТекIоныгъэр къафагъэшъошагъ Мыекъуапэ щыщ Дмитрий Нехаевымрэ къуа­джэу Кощхьаблэ къэзыгъэлъэгъо­гъэ Гъыдзэ Самирэрэ. Джащ фэдэу нахьыжъхэм якуп джэрз медальхэр къыщахьыгъ Александр Самсоновым ыкIи Арина Петровскаям. Илъэс 12 – 13 зыныбжьхэм якуп зыщызыушэтыгъэ Артем Вариводиным ящэнэрэ чIыпIэр къыфагъэшъошагъ.