Республикэ гъэзетхэу «Адыгэ макъэмрэ» «Советскэ Адыгеимрэ» яредактор шъхьаIэхэу МэщлIэкъо Саидэрэ Цундышк Зарэрэ, Теуцожь район гъэзетэу «Теучежские вести» иредактор шъхьаIэу Хьакъуй Юрэ джырэ журналистикэм ия XXVIII-рэ Форумэу «Вся Россия-2024» зыфиIорэм хэлажьэх. Къалэу Шъачэ ар тыгъуасэ къыщызэIуахыгъ.

Урысыем икъэбарлъыгъэIэс амалхэм ялIыкIохэр ыкIи IэкIыбым къикIыгъэ хьакIэхэр ащ хэлажьэх, зэкIэмкIи нэбгырэ 1000-м ехъу — журналистхэр, сатыум, хабзэм ялIыкIохэр.
Форумым лекциехэм къащяджэщтых, къэбарлъыгъэIэс амалхэм япроектыкIэхэм ялъэтегъэуцо щыкIощт, зэлъа­шIэрэ журналистхэр IофшIэкIэ амалхэмкIэ къекIолIагъэхэм адэгощэщтых, Iэнэ хъураехэр, къэгъэлъэгъон зэфэшъхьафхэр щызэхащэщтых.
Нбгырэ 60-м ехъумэ яIофшIакIэ къа­Iотэщт, ахэм ащыщых: Владимир Соловьевыр, Урысыем ижурналистхэм я Союз итхьаматэ; Рифат Сабитовыр, УФ-м и Общественнэ палатэ къэбар­лъыгъэIэсын сообществэм, къэбарлъыгъэIэс амалхэм ыкIи коммуникацие жъугъэм хэхъоныгъэ ягъэшIыгъэнымкIэ и Комиссие итхьаматэ; Павел Гусевыр, гъэзетэу «Московский комсомолец» зыфиIорэм иредактор шъхьаIэ; Руслан Новиковыр, «Аргументы и Факты» зыфиIорэм ипащэ; Николай Афиногеновыр, VK-м лъыгъэкIотэгъэнымкIэ ыкIи аналитикэмкIэ ипащэ; Кирилл Вышинскэр, «Урысыер непэ» зыфиIорэ дунэе къэбарлъыгъэIэс агентствэм игъэцэкIэкIо пащэ; Виталий Третьяковыр, Москва къэралыгъо университетым телевидениемкIэ и Апшъэрэ еджапIэ идекан, нэмыкIхэри.

Джащ фэдэу Iофтхьабзэм хэлажьэхэрэр аIукIэщтых ИТАР-ТАСС-м игенеральнэ пащэу Андрей Кондрашовым, сенаторэу, каналэу «ТВ Центр» зыфиIорэм икъэтынэу «Постскриптумым» изещакIоу ыкIи иавторэу Алексей Пушковым, нэмыкIхэми.
Форумым тхьамафэрэ Iоф ышIэщт, Iоныгъом и 22-м зэфашIыжьыщт.
«Шъолъыр зэфэшъхьафхэм, къэралыгъом ипэрыт IофшIэгъухэм уаIукIэныр сыдигъокIи гъэшIэгъоны ыкIи IофшIэным ихэгъэхъонкIэ амалышIу — ахэм Iоф зэрашIэрэ шIыкIэм уеплъы, о зэрэпшIэрэми уасэу къыфашIырэр зэогъашIэ. Форумым иIофшIэн бэ Iофыгъо гъэшIэгъонэу къыщаIэтыщтыр ыкIи, сэ сишIошIкIэ, ащ хэлажьэхэрэм шIэныгъэу зэрагъэгъотыщтыр къэбарлъыгъэIэс амалэу ахэр зилIыкIохэр лъыкIотэнхэмкIэ къашъхьапэжьыщт, яджэхэрэмкIи, яплъыхэрэмкIи ахэр нахь гъэшIэгъон зышIыщт амалыбэу непэрэ лъэхъаным диштэхэрэмкIэ ушъа­гъэ хъущтых», — къыхигъэщыгъ «Адыгэ макъэм» иредактор шъхьаIэу Мэщ­лIэкъо Саидэ.
«2007-рэ илъэсым къыщыублагъэу гъэ къэс мыщ сыхэлажьэ. Форумыр — зэлъашIэрэ цIыфхэм, журналист цIэрыIохэм аIукIэгъэнымкIэ амалышIу. Дэгъу дэдэу Iофтхьабзэр зэхащэ, узэплъын, узыIукIэн, узэрыгущыIэн икъун щыI. Мары Нижний Новгород, Пензэ, Челябинскэ, Чебоксархэм, Санкт-Петербург, Москва, Темыр Кавказым къарыкIыгъэ тиIофшIэгъухэр нэIуасэ тшIыгъэхэу тызэдэлажьэ. Тигуа­пэу ренэу Iофтхьабзэм тыхэлажьэ. Форумыр тищыкIэгъэ шъыпкъ, ар щыIэн фай, мары я 28-у зэхащэ, тыщэгугъы джыри илъэсыбэрэ зэхащэным!» — къы­тиIуагъ Хьакъуй Юрэ.