УФ-м и Президент и Джэпсалъэ пшъэрылъэу къыщишIыгъэхэм япхырыщын къыдыхэлъытагъэу гъэстыныпхъэ шхъуантIэр къызIэкIэмыхьэхэрэр «догазификацием» фэгъэхьыгъэ программэм хэлэжьэнхэ амал щыIэ хъугъэ. ЫпкIэ хэмылъэу чIыгу Iахь гъунэхэм газыр афящэлIэгъэнэу ары ащ къызэрэщиIорэр.

АР-м и ЛIышъхьэ иунашъокIэ псэупIэ-коммунальнэ хъызмэтшIапIэхэм, промышленнэ ыкIи нэмыкI организациехэм гъэстыныпхъэ шхъуантIэр ящэлIэгъэным фытегъэпсыхьэгъэ шъолъыр программэм чъыгхэтэ товариществэхэм ар зэраратыщтым иплан хэгъэхьагъэ хъугъэ.
Планыр ыкIи пIалъэу пылъхэр Росреестрэм иинтернет нэкIубгъо итых: https://rosreestr.gov/ru/open-servise/statistika-i-ahalitika/0I-ihformatsiya-ob-sht-podpadayushchikh-pod-programmu-gazifikatsii/.
— Проектыр игъом пхырыщыгъэ хъу­ным фэшI республикэм ихэбзэ къулыкъухэмрэ гъэстыныпхъэ шхъуантIэм итын фэгъэзэгъэ шъолъыр операторымрэ тхылъхэм ягъэхьазырынкIэ ГъэIорышIапIэр IэпыIэгъу афэхъу, — къыIуагъ Росреестрэм АР-кIэ и ГъэIорышIапIэ ипащэ иIэнатIэ зыгъэцэкIэрэ ЕмыкI Марыет.
Джащ фэдэу къулыкъур чъыгхэтэ организациехэм, товариществэхэм ялIыкIоу къяуалIэхэрэм упчIэжьэгъу афэхъу, цIыфэу гъэстыныпхъэр ищагу къыращалIэмэ зышIоигъохэм адеIэ.
Компаниеу «Роскадастрэм» и Къутамэу АР-м щыIэми чъыгхэтэ товариществэхэм газыр аIэкIэгъэхьэгъэным фытегъэпсыхьэгъэ IофшIэнхэм къадыхэ­лъытагъэу, ахэм псэуалъэу адэтхэм ыкIи ячIыгу Iахьхэм япхыгъэ кадастрэ Iоф­шIэнхэр зэшIуехых.
— ИщыкIагъэ хъумэ, гъэстыныпхъэ шхъуантIэр ращэлIэным ищыкIэгъэ «ситуационнэ» планыр, чIыгу Iахьхэм апае «топографическэ» планыр, нэмыкI техническэ тхылъхэр афэдгъэпсынхэм тыфэхьазыр, — къыхигъэщыгъ Роскадастрэм и Къутамэ ипащэу ХъокIо Аюбэ.
Сурэтыр: Iэшъынэ Аслъан.