ГъэпсэфыпIэу Мыекъопэ районым итхэм ащыщэу пыдзэфэ пытэхэм узэрадэзекIощтым фэгъэхьыгъэ хэбзэгъэуцугъэр зыукъо­хэрэм якъыхэгъэщын «ЭкоЦентрэм» лъегъэкIуатэ.

Ащ фытегъэпсыхьэгъэ Iофэу ашIэрэм ишIуагъэкIэ, поселкэу Каменномостскэмрэ станицэу Дахъомрэ Iоф ащызышIэхэрэм хэкIым идэщын фэгъэхьыгъэ зэзэгъыныгъэ 20 адашIыгъ.
— ХьакIэхэр зэрагъэблэгъэрэ унэхэр (Гостевой дом) зиехэм ащыщхэм шъо­лъыр операторым зырагъэтхынышъ, пыдзэфэ пытэхэр зэрэIуащырэм ыпкIэ атын фаеу алъытэрэп. Ау ащ пае къэмынэу хэкIыр Iузыщырэ автомашинэхэр къызщыкIорэ уахътэм тефэу пыдзафэхэр къыдахых. Ащ фэдэ хьэкIэ унэхэм янахьыбэр нэмыкI псэупIэхэм зэрахэтхэм къыхэкIыкIэ, хэкIыр къыдэзыхыгъэр къэшIэгъуай. Арышъ, техникэм зэкIэ Iуещы. Ащ тетэу хэкIыр дэзыщырэ авто­машинэхэр шIэхэу аушъэх, мызэу, мытIоу а зы гъогум рыкIожьынхэшъ, пыдзафэхэр къаугъоижьын фаеу мэхъу. Ащ тэри, цIыфэу псэупIэхэм адэсхэри езэгъынхэ алъэкIыщтэп, — къыIуагъ «ЭкоЦентрэм» и Адыгэ шъолъыр къутамэ ипащэу Алыбэрд Налбый.
Ащ фэдэ юридическэ лицэхэм рек­ламэу атырэм, унэхэм арагъэблагъэхэу къатыратхэхэрэм, интернет нэкIубгъохэм къарыхьэхэрэм яшIуагъэкIэ хэбзэгъэ­уцугъэр зыукъохэрэр «ЭкоЦентрэм» иIофышIэхэм къыхагъэщых. Шъолъыр операторым зэзэгъыныгъэ къыдэзышIыгъэри, ыпкIэ хэмылъэу хэкIыр зыфыIуа­щырэри агъэунэфышъ, тхылъыр ыгъэ­псыныр шIокI зимыIэ Iофэу зэрэщытыр къызщиIорэ письмэр фагъэхьы. Ащ ыуж хьэкIэ унэр зием зэзэгъыныгъэ къыдимышIымэ, лъыплъэкIо къулыкъухэм е хьыкумым афегъэхьы.
Шъугу къэтэгъэкIыжьы, экологие ыкIи санитар шапхъэхэр зымыгъэцакIэхэрэм административнэ тазыр сомэ мин ­250-м нэсэу рагъэтыщт е чэщ-зымэфэ 90-кIэ иIофшIэн къызэтырагъэуцощт.
Зэзэгъыныгъэр шъолъыр операторым зэрэдэпшIыщтыр ащ иинтернет нэкIубгъо ит: https://adygeya.clean-rf.ru. Джащ фэдэу офисым уекIуалIэми бгъэпсын ­плъэкIыщт. Мары адресыр: къалэу Мыекъуапэ, урамэу Пионерскэр, 297.
«ЭкоЦентрэм» и Адыгэ шъолъыр къутамэ ипресс-къулыкъу.
Сурэтыр: «ЭкоЦентрэр».