Адыгеим икъэлэ шъхьаIэу Мыекъуапэ хэхъоныгъэ ышIыным къыдыхэлъытагъэу икъохьэпIэ лъэныкъо районитIу щагъэпсы. Ащ нэмыкIэу къалэм икъокIыпIэ лъэныкъокIэ щагъэпсыгъэ районыкIэм щашIыгъэ унэхэм цIыфхэр ачIэхьажьыгъэх. Апэрэ урамищэу ащ пхырыкIыхэрэм хэушъхьафыкIыгъэ дзэ операцием хэлажьэхэзэ, лIыгъэ хэлъэу зыпсэ зытыгъэ Урысыем и ЛIыхъужъхэм ацIэкIэ яджагъэх. Ахэр тичIыгогъухэу полковникэу Роман Тороховымрэ майорэу Вадим Лемешрэ, джащ фэдэу гвардием ипоковникэу Владимир Жога.
Республикэм лъэшэу анаIэ ащытырагъэты хэ­ушъхьа­фыкIыгъэ дзэ операцием хэлажьэхэрэм яунагъохэм ыкIи уIагъэ зытелъэу къэзыгъэзэжьыгъэ зэолIхэм. Ахэм зэу ащыщ Эдуард Бараевыр. Дзэ операциер зэрэрагъэжьагъэм тетэу ар апэрэу кIэпсэжъыем зэпырыкIыгъ. Нэбгырабэхэм афэдэу, запасым щыIэ сержантыр рэхьатэу ыбгъукIэ щытэу яплъышъу­гъэп. Запоржскэ лъэныкъом щызэуагъ, ащ къыщауIи ипсауныгъэ зыпкъ зырегъэуцожьым етIани Хэгъэгур къыухъумэнэу ыгъэзэжьыгъ. ХерсонымкIэ щыIэ артиллерийскэ подразделением хэтэу дзэ пшъэрылъхэр ыгъэцакIэхэзэ, уIэгъэ хьылъэ къытыращагъ. Ащ ыпкъ къикIыкIэ ядэжь къэкIожьынэу хъугъэ. Фондэу «Хэгъэгум иухъумакIохэр» зыфиIорэм ишъолъыр къутамэ лIыхъужъым ищыкIэгъэ IэпыIэгъу ригъэгъотынэу макъэ ригъэIугъ. Дзэ операцием иветеран хэушъхьафыкIыгъэ протез къыратыгъ. Ащ ишIуагъэкIэ Эдуард спортым пылъын елъэкIы. А къэбарыр социальнэ хъытыухэм къащиIотагъ Урысыем ифондэу «Хэгъэгум иухъумакIохэр» зыфиIорэм ипащэу Анна Цивилевам.
— Ветераным Ставрополь щыкIогъэ зэнэкъокъум игупсэ шъолъыр къыщигъэлъэгъуагъ. Къиныгъохэр зэпачыхэзэ, спортым ылъэныкъокIэ гъэхъагъэхэр ашIынхэм тилIыхъужъхэр зэрэфэбанэхэрэм сырэгу­шхо! — хигъэунэфыкIыгъ Анна Цивилевам.