Красногвардейскэ районыр зызэхащагъэр илъэси 100 зэрэхъурэр муниципальнэ образованием игъэкIотыгъэу блэкIыгъэ шэмбэтым щыхагъэунэфыкIыгъ. МэфэкI Iофтхьэбзэ шъхьаIэхэр зыщыкIуагъэхэр район гупчэу Красногвардейскэр ары.

Адыгеим и ЛIышъхьэу КъумпIыл Мурат ащ щыIагъ.
Районым иадминистрацие зычIэт унэм ыпашъхьэ сценэу щагъэуцугъэм районым исхэмрэ ихьакIэхэмрэ апае творческэ номер зэфэшъхьафхэр къыщагъэлъэгъуа­гъэх, муниципалитетым тарихъ гъогоу къыкIугъэр ыкIи ащ гъэхъагъэу иIэхэр къыщаIотагъэх.
Республикэм и ЛIышъхьэ Красногвардейскэ районым ипащэу Гъубжьэкъо Темур игъусэу юбилеим ехъулIэу агъэцэкIэжьыгъэ социальнэ псэуалъэхэр, къоджэ псэупIэхэм ящагухэу мэфэкIым ехъулIэу зэтырагъэпсыхьагъэхэр къызэпиплъыхьагъэх, районыр зызэхащагъэр илъэси 100 зэрэхъурэмкIэ ичIыпIэгъухэм афэгушIуагъ.

Адыгеим и ЛIышъхьэ республикэм ихэхъоныгъэ лъэпсэ пытэ фэзышIыгъэхэм, щыIэкIэ дэгъу яIэнымкIэ ищыкIэгъэ пстэури зышIагъэхэм «тхьашъуегъэпсэу» ариIуагъ.
«IофшIэныр зикIэсэ, зичIыгу гупсэ шIу зылъэгъурэ цIыф хъуп­хъэхэр ары Красногвардейскэ районым щытхъу къыфэзы­хьы­хэрэр. Къоджэ, къутыр гупсэм федэ горэ къыфэзыхьыщт Iофхэм зэрапылъхэм ишIуагъэкIэ ренэу ыпэкIэ лъыкIотэнхэ, ягъэхъагъэхэм ахагъэхъон алъэ­кIы», — къыIуагъ КъумпIыл Мурат.
Адыгеим и ЛIышъхьэ Красногвардейскэ районым исхэм, иветеранхэм, ина­хьыжъхэм ячIыгу гупсэ зэрагъэлъапIэрэм, IофшIэныр зэрякIасэм афэшI лъытэныгъэ зэрафишIырэр къыIуагъ, псауныгъэ пытэ яIэнэу, яунэгъо Iофхэр дэгъоу зэпыфэнхэу, IофышIоу рахьыжьэ­хэрэм гъэхъагъэхэр ащашIынэу афэлъэ­Iуагъ.
Шъугу къэтэгъэкIыжьы Адыгеим имызакъоу, нэмыкI чIыпIэхэми ащызэлъа­шIэрэ цIыф цIэрыIохэр Красногвардейскэ районым къызэрэщыхъугъэхэр. Ахэр — Советскэ Союзым и ЛIыхъужъхэу Николай Ищенкэр, Иван Чучвага, Константин Василенкэр, Иван Калимановыр; Щытхъум иордени 3 къызыфагъэшъошагъэу Иван Есиныр; Социалистическэ IофшIэным и ЛIыхъужъхэу Любовь Лысенкэр, Любовь Якшинар; Урысыем и ЛIыхъужъэу Николай Шевелевыр; Урысыем изаслуженнэ врачэу Сергей Сахно; тхакIохэу Кэстэнэ Дмитрий, Еутых Аскэр, ХьадэгъэлIэ Аскэр, КъумпIыл Къадырбэч, Кощбэе Пщымаф ыкIи нэмыкIхэр.

Джащ фэдэу лэжьыгъэм икъэхьы­жьын­кIэ, цумпэхэм якъэгъэкIынкIэ, мыбюджет инвестициехэмрэ чIыпIэ бюджетым ихьэрэ федэхэмрэ зэрахахъорэмкIэ муниципальнэ образованием пэрытныгъэ ыIыгъ зэпыт. Предпринимательствэ цIыкIумрэ гурытымрэ япредприятиехэу гъо­мылэпхъэшIыным, гъэщхэкIхэм, сатыум, мэкъумэщ техникэм икъыдэгъэкIын апылъхэм япродукцие имызакъоу, адыгэ къуаемрэ адыгэ бжьыныф щыгъумрэ якъыдэгъэкIынкIэ Красногвардейскэ районыр Адыгеим щызэлъашIэ.
ПсэупIэм итеплъэ зехъожьы
Адыгеим и ЛIышъхьэу КъумпIыл Мурат Красногвардейскэ рйоным зэкIом, псэупIэу Красногвардейскэм иурамхэу Советскэм, Кооперативнэм, 50 лет Октября зыфиIорэм якIолIэрэ автомобиль гъогур зэрагъэкIэжьыгъэм зыщигъэгъозагъ, стадионэу «Олимпым» ыкIи культурэм и Унэу мыгъэ мыщ щагъэцэкIэжьыгъэхэр къызэпиплъыхьагъэх.
Муниципальнэ образованиеу «Красногвардейскэ районым» ипащэу Гъубжьэкъо Темур агъэкIэжьыгъэ псэуалъэ­хэм къатегущыIэзэ, автомобиль гъогум сомэ миллиони 125-м ехъу зэрэпэIухьагъэр къыIуагъ.
Автомобиль гъогоу агъэкIэжьыгъэм километрэ 1,6-рэ, лъэсгъогум километри 2-м ехъу якIыхьагъ, километрэ 1,5-мэ остыгъэхэр ащыпалъагъэх. АгъэкIэжьыгъэ гъогур Красногвардейскэм игупчэ пхырэкIы. IофшIэнхэр зэкIэ игъом зэшIуахыгъэх. Мы илъэсым ижъоныгъуакIэ къыщегъэжьагъэу ишышъхьэIу мазэ нэс лъэсрыкIо зэпырыкIыпIэхэр зэтырагъэ­псыхьагъэх, чIычIэгъ IофшIэнхэр аухыгъэх.
Нэужым КъумпIыл Мурат стадионэу «Олимпым» щыIагъ. Шъугу къэтэгъэ­кIыжьы чIыпIэ кIэлэцIыкIу спорт еджапIэм ибаланс хэт стадионыр лъэпкъ проектэу «Демографием» ифедеральнэ проектэу «Спортыр – щыIэныгъэм ишапхъ» зыфиIорэм 2020-рэ илъэсым зэрэхагъэхьагъэр. Ахъщэу къыхагъэкIыгъэмкIэ IэрышI футбол ыкIи теннис ешIапIэхэр, лъэныкъуабэмэ афытегъэ­псыхьэгъэ джэгупIэр, къызыщачъыхьащт лъэс лъагъохэр агъэпсыгъэх, тренажерхэр агъэуцугъэх.
Республикэм и ЛIышъхьэ пшъэрылъ зэрафишIыгъэм тетэу АР-м мэкъу-мэщымкIэ и Министерствэрэ АР-м физическэ культурэмрэ спортымрэкIэ и Комитетрэ япащэхэм муниципалитетым щыпсэухэрэр ягъусэхэу стадионым дэт унэхэу къулыкъушIэ кабинетхэр, тренажер залыр, зытIэкIыпIэр зыхэтхэм ягъэцэкIэжьын епхыгъэ Iофыгъохэм язэшIохын ыуж ихьагъэх. Трибунэхэм язэблэхъункIи, остыгъэхэр урамхэм ащыгъэуцугъэнхэмкIи, къапэIулъ чIыпIэхэм язэтегъэпсыхьанкIи пшъэрылъ гъэнэфагъэхэр агъэцэкIагъэх.

Къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм диштэу мыгъэ пшъэрылъхэр зэкIэ агъэ­цэкIагъэх. Стадионым иинженер коммуникациехэр, унашъхьэр зэблахъу­гъэх, зыгъэпскIыпIэ ашIыгъ. Нэбгыри 100-мэ ателъытэгъэ трибунакIэхэр стадионым щагъэпсыгъэх, мебелыр, спорт оборудованиер, чIыпIэ кIэлэцIыкIу спорт еджа­пIэм ищыкIэгъэ пкъыгъохэр къащэфыгъэх.
Республикэм и ЛIышъхьэ къэзэрэугъоигъэхэм анаIэ тыраригъэдзагъ зэрищыкIагъэм тетэу стадионыр Iыгъыгъэн, спорт Iэмэ-псымэхэр игъом зэблэхъугъэнхэ, цIыфхэр спортымрэ физическэ культурэмрэ нахь апыщэгъэнхэ зэрэ­фаем.
Стадионым ыуж КъумпIыл Мурат культурэм и Унэ Красногвардейскэм зэрэщагъэкIэжьырэм зыщигъэгъозагъ. Къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм диштэу гъэцэкIэжьын IофшIэнхэр мыщ щэкIох, илъэсыр имыкIызэ ахэр аухынэу рахъухьэ. ГъэцэкIэжьынхэм апэIухьащт сомэ миллион 55-м ехъур бюджет зэфэшъхьафхэм къахагъэкIыгъ. Проектым игъэцэкIэн ыкIэм фэкIо. Джыдэдэм культурэм и Унэ къыпэIулъ чIыпIэр зэтырагъэпсыхьэ, чэукIэ ар къашIыхьэ.
КъэбарлъыгъэIэс амалхэм яIофы­шIэхэм адэгущыIэзэ, республикэм и ЛIышъхьэ къыхигъэщыгъ зэхъокIыныгъэ­шIухэр иIэхэу Красногвардейскэ районыр имэфэкI къызэрекIолIагъэр.
«Лъэпкъ проектхэмрэ къэралыгъо программэхэмрэ яшIуа­гъэкIэ мыщ бэ щызэшIуа— хыгъэр, къэралыгъом иIэпыIэгъу цIыфхэм зэхашIэ хъугъэ. МыщкIэ хэгъэгум и Президентэу Владимир Путиным екIолIакIэу иIэм ишIогъэшхо къэкIо – цIыфхэм яцыхьэ нахь зытелъыжь хъугъэ. ГъогукIэмкIэ социальнэ псэуалъэхэм тякIолIагъ, спортым, культурэм, гъэсэныгъэм иучреждениеу агъэкIэжьы­гъэ­хэр тлъэгъугъэх. Гъэхъагъэу яIэхэм къащымыуцунхэм, пшъэ­рылъэу апашъхьэ итхэр агъэцэ­кIэнхэм пае ыпэкIэ лъыкIо­тэн­хэм мэхьанэшхо иIэу сэлъы­тэ», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.