УсакIоу, драматургэу, журналистэу, АР-м культурэмкIэ изаслуженнэ IофышIэу Емыж МулиIэт Ибрахьимэ ыпхъум идунай ыхъожьыгъ. Лъэныкъо зэфэшъхьафхэм ащ исэнаущыгъэ къы­щигъэлъэгъуагъ. Иусэхэр зыдэт тхылъхэр къыдигъэкIыгъэх, дунэе классикхэм ятхыгъэхэр адыгабзэкIэ зэридзэкIы­жьыщтыгъэх, фильмхэм яавтор къодыеу щымытэу режиссерэуи зыкъыгъэлъэгъуагъ, сценариехэр ытхы­щтыгъ. Урысыем итхакIохэм ыкIи итеатральнэ IофышIэхэм ясоюзхэм ахэтыгъ.
Емыж МулиIэт мэлылъфэгъум и 4-м, 1951-рэ илъэсым Теуцожь рай­оным ит къуаджэу Аскъэлае къыщы­хъугъ. Краснодар дэт музыкальнэ училыщыр, М. Горькэм ыцIэ зыхьырэ литературнэ институтэу Москва дэтыр къыухыгъэх. КинематографиемкIэ Урысые къэралыгъо институтым ще­джагъ.
Адыгэ драматическэ театрэм, журналэу «Зэкъошныгъэм», Къэралыгъо телерадиокомпаниеу «Адыгеим» илъэс зэфэшъхьафхэм ащылэжьагъ, АР-м и Лъэпкъ театрэ пае дунэе классикхэм япьесэхэр зэридзэкIыщтыгъэх. А. Пуш­киным, Федерико Гарсиа Лорка, Софокл ятхыгъэхэр адыгабзэм рилъ­хьа­гъэх. Анахь IофшIэгъэ инэу иIэхэм ащыщых тарихъ документальнэ фильм­хэу «Навеки с Россией» ыкIи «Черкесские султаны Египта» зыфиIохэрэр. Ахэр Къэралыгъо телерадиокомпаниеу «Адыгеим» ихъарзынэщ изы Iахь хьалэмэтэу хэуцуагъэх. Адыгэ культурэм ыкIи искусствэм хэхъоныгъэ ашIыным ишъыпкъэу фэлэжьагъ.
Емыж МулиIэт идунай зэрихъожьыгъэр гухэкI тщыхъоу иIахьылхэм ыкIи иблагъэхэм тафэтхьаусыхэ. Тхьэм джэ­нэт лъапIэр къырет.

Адыгэ Республикэм итхакIохэм я Союз усакIоу, зэдзэкIакIоу Емыж МулиIэт Ибрахьимэ ыпхъур зэрэщымыIэжьыр гухэкIышхо щыхъоу, зидунай зыхъожьыгъэм иунагъорэ иIахьылхэмрэ афэтхьаусыхэ.
Адыгэ Республикэм итхакIохэм я Союз