Фестивалэу «Спорт командэр» зыфиIорэм шъолъырым щыпсэурэ нэбгыри 100-м ехъу хэлэжьагъ. Iофтхьабзэм кIэщакIо фэхъугъэх ныбжьыкIэ общественнэ организациеу «Движение Первых» зыфиIорэм икъэлэ къутамэрэ Мыекъуапэ физическэ культурэмкIэ ыкIи спортымкIэ и Комитетрэ.

Лъэс зекIоныр зикIасэхэм лъэбэкъу мини 10 къакIун фэягъ. Iофтхьабзэр рагъэжьэным ыпэкIэ къэзэрэугъоигъэхэм зарядкэ аригъэшIыгъ спортымкIэ дунэе класс зиIэ мастрэу Николай Колесниковым. Нэужым командэ 23-рэ зэнэкъокъугъ.
Зэфэхьысыжьхэм къызэрагъэлъэгъуагъэмкIэ, командэхэу «Стрижи» ыкIи «Альфа» балл 73-рэ зырыз рагъэкъугъ, ау гъогур нахь псынкIэу къэзыкIугъэхэр «Стрижым» хэтхэр ары. Ахэм текIоныгъэр къыдахыгъ. Ящэнэрэ чIыпIэр фагъэшъошагъ командэу «Горящие сердца» зыфиIорэм. Фестивалым хэлэжьагъэхэм зэкIэм сертификатхэр аратыгъэх.