Адыгеир мэкъумэщ шъолъырэу зэрэщытыр къагъэшъыпкъэжьызэ, тичIыгулэжьхэм илъэс къэс лэжьыгъэ бэгъуагъэ къахьыжьы. Шэуджэн районым ихъызмэтшIэпIэ пэрытхэм ащыщ пшъэдэкIыжьэу иIэмкIэ гъунэпкъэ гъэнэфагъэ зиIэ обществэу «Заря» зыфиIорэр. Ащ иагроном шъхьаIэу Къохъужъ Азамат мы мафэхэм хъызмэтшIапIэм изытет тыщигъэгъозагъ.

Непэрэ мафэм ехъулIэу хъызмэтшIапIэм гектар 1869-м ехъу елэжьы. Ащ щыщэу коц гектар 1031-м кIахьэу, хьэ гектари 145-м ехъу, тыгъэгъэзэ гектар 565-рэ, натрыф къызэрыкIоу гектар 64-рэ, «попкорн» зыфаIорэр зыхашIыкIырэ натрыф лъэпкъым фэдэу гектар 64-рэ яIагъ.
— Гъэтхасэхэм азыныкъо нахьыбэр Iутхыжьыгъах, тыгъэгъазэм иIухыжьыни тыухыгъ. Гъэрэ Iутхыжьырэм елъытыгъэ­мэ, мыгъэ гектарым тыгъэгъазэу къитхыжьыгъэр нахь макI — центнер 23-м нэсы ныIэп. Аужырэ илъэсхэм зэрэ­огъум фэшI лэжьыгъэу къэтхьыжьырэм бэу къыщэкIэ, — еIо Азамат.
ТигущыIэгъу къызэриIуагъэмкIэ, хъыз­мэтшIапIэр техникэкIэ зэтегъэпсы­хьагъ, аужырэ шапхъэхэм адиштэрэ тракторэу, комбайнэу къащэфыхэрэм япчъа­гъэ илъэс къэс хэхъо. Лэжьыгъэм ичылэпхъэшIухэу, тичIыопс нахь къекIу­хэу, илъэс пчъагъэм зэрифэшъуашэу зыкъэзыгъэлъэгъуагъэхэр ары апхъы­хэрэр. Ахэм ячIыгухэми, охабзэми къякIух, охътэ кIэкIым зигъо хъурэ лъэпкъых.
Лэжьыгъэм икъэгъэкIын, иIухыжьын мафэ къэс мыпшъыжьэу дэлажьэу, илъэс пчъагъэ хъугъэу мыщ Iоф щызышIэрэр макIэп. Къахэбгъэщын щымыIэу зэкIэри дэгъоу, хьалэлэу мэлажьэх. Механизатор цIэрыIоу, УФ-м ыкIи АР-м мэкъумэщымкIэ язаслуженнэ IофышIэу Сергей Панкрушиныр илъэсыбэ хъугъэу хъызмэтшIапIэм щэлажьэ. Ащ ыкъоу Анатолий Пшызэ мэкъумэщ институтыр къыухи къэкIожьыгъэу, ятэ готэу мэлажьэ. IофышIэ бэлахьхэу Юрий Шарновыр, Михаил Федоровыр, Максим Кульбаевыр, Владимир Терентьевыр, Виктор Кудриныр хъызмэтшIапIэм илэжьэкIо пэрытых. Ахэм непэрэ щыIэныгъэм зыдырагъаштэ, шIэныгъакIэхэр зэрагъэгъоты, шэпхъэшIухэр агъэфедэхэзэ гъэхъагъэхэр ашIых.

— Аужырэ шапхъэхэм адиштэрэ тракторхэр, комбайнэхэр, лэжьыгъэр зэрэкIащырэ машинэхэр ыкIи губгъо IофшIэнхэр зэрэдгъэцэкIэрэ Iэмэ-псымэхэр зэтедгъэпсыхьагъэх. Комбайнэхэм чIэнагъэ ямыlэу лэжьыгъэр аlожьы. Гъэстыныпхъэр икъоу механизаторхэм аIэкIэтэгъахьэ. Лэжьыгъэхэм зэрифэшъуашэу тяшIушIагъ, минеральнэ чIыгъэшIухэр ахэтлъхьагъ, щэнаутхэри атетыутхагъ. ЧIыгулэжьыныр къины къэзышIырэр чIыопсым изытет зэблэхъу­гъэ зэрэхъугъэр ары, — къыIуагъ Къо­хъужъ Азэмат.
Пэрытныгъэ зыIыгъ хъызмэтшIaпIэм гухэлъышIухэр иIэх, ахэр къыдэхъунхэу тэри тыфэлъаIо.
Лъэпшъыкъо Фатим.
Сурэтхэр: Iэшъынэ Аслъан.