АР-м псэупIэ-коммунальнэ хъызмэтымкIэ и ГъэIорышIапIэ къызэрэщаIуагъэмкIэ, ­бжыхьэ-кIымэфэ уахътэм фабэр цIыфхэм аIэкIэзыгъэхьэрэ псэуалъэхэм япроцент 94-м ехъур хьазыр.

Шапхъэхэм къызэрадэлъытагъэм тетэу, кIымафэр икIи фабэр къатын имыщыкIэгъэжь зэхъум, муниципальнэ образование пэпчъ ипсэупIэ-коммунальнэ хъызмэт епхыгъэ псэуалъэхэм ­язытет ыуплъэкIугъ, ащ къыгъэлъэгъуагъэхэм къапкъырыкIызэ, гъэцэкIэжьын IофшIэнэу зэшIуахын фаехэм яплан къызэхигъэ­уцуагъ, нэужым республикэм зэрэщытэу щашIэщтыр агъэнэфагъ, ащ диштэу Iоф­шIэнхэри зэшIуахыгъэх. ПстэумкIи сомэ миллиони 100 фэдиз ахэм апэIуагъэ­хьагъ.
Джащ фэдэу Ростехнадзорымрэ Стройнадзорымрэ ялIыкIохэр зыхэхьэрэ комиссиехэр районхэм ыкIи къалэхэм ащызэхащагъэх. Ахэм бэдзэогъу мазэм къыщегъэжьагъэу фабэр цIыфхэм къязы­тырэ организациехэр ауплъэкIух. А IофшIэнхэр Тэхъутэмыкъое, Теуцожь, Джэджэ, Красногвардейскэ, Мыекъопэ ыкIи Кощхьэблэ районхэм ащызэшIуа­хыгъахэх, охътэ благъэм Шэуджэн районым щырагъэжьэщт.
Комиссиехэм ахэтхэм котельнэхэр, фабэм икIуапIэхэр, тхылъэу агъэхьазырыгъэхэр, Iоф ащызышIэхэрэм икъу фэдизэу япшъэрылъхэм хэшIыкI афыряIэмэ ауплъэкIух. ПсэупIэ-коммунальнэ хъызмэтымкIэ ГъэIорышIапIэм иотдел ипащэу Хъымыщ Тимур къызэрэтиIуагъэмкIэ, лъэныкъо зэфэшъхьафхэмкIэ щыкIэгъи 183-рэ къыхагъэщыгъ. Журналэу уплъэкIунхэм къагъэлъэгъуагъэр зыдэтхэгъэн фаехэр, электричествэм епхыгъэ псэуалъэхэмкIэ пшъэдэкIыжь зыхьыхэрэр зэрямыIэхэм, унэхэр игъом зэрамыуплъэкIугъэхэм, хьакухэм язытет зэрэзэрамыгъэшIагъэм, нэмыкIхэм ахэр япхыгъэх. Къыхагъэщыгъэм щыщэу 80-р охътэ кIэкIым дагъэзыжьыгъ, къэнагъэр чъэпыогъум и 1-м нэс зэшIуахын фае.
— ХъызмэтшIапIэ пэпчъ щыкIагъэхэр зэрэдигъэзыжьыщтхэ «гъогу картэр» ыгъэпсыгъ. IофшIэнхэр заухыкIэ, джыри зэ Ростехнадзорым письмэ фагъэхьыщт, етIанэ ащ зэкIэ ыуплъэкIужьыщт, — къыIуагъ Хъымыщ Тимур.
Чъэпыогъу мазэм Ростехнадзорым социальнэ псэуалъэхэри, фэтэрыбэу зэхэт унэхэри, нэмыкIхэри ыуплъэкIунхэшъ, зыпари щыкIагъэ къахимыгъэщыжьмэ, унэхэм ягъэфэбэн зэрэфэхьазырхэр къэзыушыхьатырэ тхылъхэр къаритыщтых.
ПстэумкIи мыгъэ котельнэ 258-рэ, фабэр къэзытырэ пунктэу 25-рэ, ащ икIуапIэу километрэ 288-рэ, гъэстыныпхъэ шхъуантIэм икIуапIэу километрэ мини 3-м ехъу, псы къычIэщыпIэу 276-рэ, ащ икIуапIэу километрэ 2300-м ехъу, фэтэрыбэу зэхэт унэ 1958-рэ агъэхьазырыгъ.
ПсэупIэ-коммунальнэ хъызмэтым епхыгъэ псэуалъэхэр бжыхьэ-кIымэфэ уахътэм фэгъэхьазырыгъэнхэмкIэ пэрыохъу хъухэрэм ащыщых электро­энергием, гъэстыныпхъэ шхъуантIэм апкIэ игъом къэзымытыгъэхэр. Хъымыщ Тимур къызэриIуагъэмкIэ, нахьыбэу чIыфэ зытелъхэр Адыгэкъалэ, Мыекъопэ, Джэджэ, Красногвардейскэ ыкIи Тэхъутэмыкъое районхэм яхъызмэтшIапIэхэр ары.
— Муниципальнэ образованиехэм япащэхэм мы Iофыгъом идэгъэзыжьын нахьыбэу анаIэ тырагъэтын, хъызмэтшIапIэхэм чIыфэу ателъыр икIэрыкIэу къазэрафалъытэжьыщт (реструктуризация) графикыр зэхэгъэуцогъэным лъыплъэнхэ фае, — къыIуагъ ащ.
Арэу щытми, чIыфэхэм якъэугъоижьынкIэ Iофхэр зыпарэкIи нахьышIу мыхъугъэхэу пIон плъэкIыщтэп. Илъэсэу тызхэтым имэлылъфэгъу мазэ электроэнергиеу агъэфедагъэм пае къамытыгъэр сомэ миллиони 159-м ехъущты­гъэу, гъэстыныпхъэ шхъуантIэмкIэ ателъыр сомэ миллион 571,3-рэ хъущтыгъэмэ, шышъхьэIум и 1-м апэрэ пчъагъэр сомэ миллиони 144-м, ятIонэрэр сомэ миллион 400-м ехъум нэс къеIыхыгъэх.
ХЪУТ Нэфсэт.