Шъухэлэжьэнэу шъурагъэблагъэ
Общественнэ организациеу «Лига здоровья нации» зыфиIорэм лъэс зекIонымкIэ Урысыем ичемпионат шъухэлэжьэнэу шъурегъэблагъэ.
Мы организациемрэ УФ-м спортымкIэ и Министерствэрэ яшIуагъэкIэ цIыфхэм япсауныгъэ агъэпытэным фытегъэпсыхьэгъэ программэр щыIэныгъэм щыпхыращы.
Лъэпкъ проектэу «Демографием» ипрограммэу «КIорэ цIыфыр» зыфиIорэм шIогъэшхо къызэрихьырэр нэрылъэгъу. Проектым игъэцэкIэн къыдыхэлъытагъэу 2024-рэ илъэсым лъэс зекIонымкIэ Урысые команднэ зэнэкъокъухэр рагъэкIокIыщтых. Ахэм студентхэр, унагъохэр, пенсионерхэр, нэмыкIхэр ахэлэжьэнхэ алъэкIыщт. Нэбгырэ пэпчъ мафэм къыкIурэ лъэбэкъу пчагъэр къалъытэщт, нэужым анахь дэгъухэр къыхахыщтых.
Илъэситф хъугъэу зэхащэрэ Iофтхьабзэм зыщызыушэтыхэрэм япчъагъэ хэпшIыкIэу хэхъуагъ, джырэ уахътэм ар нэбгырэ мин 95-м кIэхьагъ. Зэнэкъокъум хэлажьэ зышIоигъохэм нэбгырэ 20 – 50 зыхэт купхэр зэхащэх, мафэм къакIурэ лъэбэкъу пчъагъэр мобильнэ приложениемкIэ къалъытэ, ащ елъытыгъэу командэхэм ярейтинг зэхагъэуцо.
Мы илъэсым зэнэкъокъур едзыгъуитIоу агощыгъ. Iоныгъом и 26-м щегъэжьагъэу чъэпыогъум и 10-м нэс кIощт Iофтхьабзэм ащ хэлэжьэщтхэр щатхыщтых, командэхэр зэхащэщт, ахэр рагъэджэщтых. Чъэпыогъум и 15-м щыублагъэу шэкIогъум и 15-м нэс рагъэкIокIыщт ятIонэрэ уцугъо шъхьаIэм командэхэр щызэнэкъокъущтых.
Зэфэхьысыжьхэм ялъытыгъэу текIоныгъэр къыдэзыхыгъэхэм афэгушIощтых, агъэшIощтых.