Социальнэ программэхэм ади­ш­тэу фэтэр 24-мэ яIункIыбзэ­хэр зыщаратыжьыгъэ Iоф­тхьабзэр тыгъуасэ Мыекъуапэ икъокIыпIэ лъэныкъо щыкIуагъ.

ЗэхэонкIэ щынэгъо псэупIэхэм цIыф­хэр къачIэщыжьыгъэнхэм тегъэпсыхьэгъэ республикэ программэм къыдыхэлъытагъэу фэтэри 10-р аратыгъ. Фэтэр 14-р кIэлэцIыкIу ибэхэм, ны-тыхэр зы­шъхьарымытыжь кIэлэцIыкIухэм къа­фыхагъэкIыгъ. Адыгеим и ЛIышъхьэу КъумпIыл Мурат унэхэр зэратыгъэхэм афэгушIонэу мыщ къэкIуагъ.
Джащ фэдэу Iофтхьабзэм хэлэжьагъэх АР-м ифедеральнэ инспектор шъхьа­Iэу Сергей Дрокиныр, Адыгеим ипрокурорэу Игорь Шевченкэр, Урысыем и Следственнэ комитет АР-мкIэ иследст­веннэ гъэIорышIапIэ ипащэ ипшъэрылъхэр зыгъэцакIэу Александр Остапенкэр, къалэу Мыекъуапэ имэрэу Геннадий Митрофановыр, АР-м иминистрэхэм я Кабинет хэтхэр, депутатхэр, псэолъэшIыным фэгъэзэгъэ фирмэм ипащэу Александр Залуцкэр.
Республикэм и ЛIышъхьэ унакIэхэм ачIэхьажьыгъэхэм афэгушIуагъ, псэолъэшIыным зегъэушъомбгъугъэнымкIэ, цIыф куп заулэмэ фэтэрхэр къафыхэгъэ­кIыгъэнымкIэ IэпыIэгъу къафэхъурэ пстэуми «тхьа­шъуегъэпсэу» ари­Iуагъ. Илъэсыр имы­кIызэ мы микрорайоным джыри фэтэр 76-рэ къащаратыщт, ащ щыщэу 28-р сабый ибэхэм атефэщт. 2024-рэ илъэсым микрорайонэу «Черемушкэм» кIэлэцIыкIу ибэхэм джыри фэтэр 34-рэ къащыфыхагъэкIыщт. ЖъоныгъокIэ мазэм мы чIыпIэм щагъэпсыгъэгъэ фэтэр 25-мэ яIункIыбзэ­хэр аратыжьыгъагъэх.
Шъугу къэтэгъэкIыжьы 2023-рэ илъэ­сым сомэ миллиони 177,5-рэ зытефэгъэ псэупIэ 71-рэ къызэращэфыгъэр. Мы илъэсым Адыгеим и ЛIышъхьэ пшъэ­рылъ зэрафишIыгъэм тетэу мылъку тедзэ къыхагъэкIыгъ. ПстэумкIи сомэ миллион 368,10-рэ къатIупщыгъ. АщкIэ кIэлэцIыкIу ибэхэм фэтэри 143-рэ фащэфыгъ.
«Урысыем и Президентэу Владимир Путиным къыгъэнэфэгъэ пшъэрылъхэм, республикэм исхэм апашъхьэкIэ пшъэ­рылъэу тиIэхэм ягъэцэкIэн лъытэгъэкIуа­тэ, цIыфхэм, апэрэ чэзыоу IэпыIэгъум лъэшэу фэныкъохэм, щыIэкIэ-псэукIэ тэрэз яIэнымкIэ ищыкIэгъэ амалхэр зэ­кIэ зетэхьэх», — къыIуагъ КъумпIыл Мурат.
Адыгеим и ЛIышъхьэ къызэрэхигъэщыгъэмкIэ, къэралыгъо программэхэм, лъэпкъ проектэу «ПсэупIэмрэ къэлэ щыIакIэмрэ» зыфиIорэм яшIуагъэкIэ социальнэ инфраструктурэр нахьышIу ашIын, сабый ибэхэм унэхэр ягъэгъотыгъэнхэм, зэхэонкIэ щынэгъо унэхэр Iухыжьыгъэнхэм япхыгъэ Iофыгъохэр зэшIуахын алъэкIы. Зэдиштэу чIыпIэхэр зэтегъэпсыхьэгъэнхэм лъэшэу анаIэ тырагъэты.
ПсэупIэ комплексыкIэм къыгот IэзапIэм Iоф ешIэ, 2023-рэ илъэсым ар къызэIуахыгъ. Илъэси 4-кIэ узэкIэIэбэжьмэ нэбгырэ 240-мэ ателъытэгъэ кIэлэцIыкIу IыгъыпIэу ашIыгъэри мэлажьэ. Нэбгырэ 1100-мэ ателъытэгъэ еджапIэм игъэпсын ыуж итых. МикрорайоныкIэм джыри фэтэрыбэ зыхэт унэ заулэ ща­шIынэу рахъухьэ.
Фэтэрхэр къазыщыратыгъэ микрорайоным иурамищмэ Урысыем и ЛIыхъужъхэу, хэушъхьафыкIыгъэ дзэ операцием лIыгъэ щызезыхьэзэ фэхыгъэхэм ацIэ афаусыгъ. Ахэр полковникэу Роман Тороховыр, майорэу Вадим Лемеш, гвардием иполковникэу Владимир Жога.
«ТапэкIи чIыпIэхэр зэдиштэу зэтегъэ­псыхьэгъэнхэм, унагъохэмкIэ ахэр Iэ­ры­фэгъоу щытынхэм, Мыекъуапэ икъо­кIыпIэ лъэныкъо джырэ шапхъэхэм адиштэным тынаIэ тедгъэтыщт», — къы­Iуагъ КъумпIыл Мурат.

Унэхэр къызэратыгъэхэм Адыгеим и ЛIышъхьэ «тхьауегъэпсэу» къыраIуагъ, хьакIэхэр яунэхэм арагъэблэгъагъэх.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.