Гухэр зэфэзыщэрэ мэфэкI
Унэгъо джэныкъом и Мафэ ипэгъокIэу искусствэхэмкIэ Адыгэ республикэ еджапIэм мэфэкI Iофтхьабзэу «Семья — союз родных сердец!» зыфиIорэр щыкIуагъ.
Хабзэ зэрэхъугъэу, зы унэгъошхоу зэхэтхэу гухэр зэфэзыщэрэ мэфэкIым щызэрэугъоигъэх. Iофтхьабзэм кIэщакIо фэхъугъ АР-м граждан Iофхэр тхыгъэнхэмкIэ и ГъэIорышIапIэ.
Унагъом мэхьанэу иIэр ныбжьыкIэхэм агурыгъэIогъэныр, зыныбжь хэкIотагъэхэмрэ ныбжьыкIэхэмрэ зэгурыIоныгъэ яIэным фэщэгъэнхэр ары пшъэрылъ шъхьаIэу зэхэщакIохэм зыфагъэуцужьыгъэр.
Iофтхьабзэм хэлэжьагъэх АР-м иминистрэхэм я Кабинет хэтхэр, Адыгеим и Къэралыгъо Совет — Хасэм идепутатхэр, федеральнэ ыкIи шъолъыр къэралыгъо хэбзэ къулыкъухэм япащэхэр, апшъэрэ еджапIэхэм ялIыкIохэр, студентхэр, журналистхэр.
Мыгъэ я 16-у рагъэкIокIырэ мэфэкIым имэхьанэ нахь зыкъиIэтыгъ, сыда пIомэ УФ-м и Президент иунашъокIэ 2024-р Унагъом и Илъэсэу агъэнэфагъ. Мы мафэм сабыибэ зиIэ ыкIи илъэсыбэрэ зэдэпсэугъэ унагъохэр агъэшIуагъэх.
— Унагъом имэхьанэ зыкъегъэIэтыгъэныр, ар гъэпытэгъэныр ары пшъэрылъ шъхьаIэр. Унэгъо пытэ зэгурыIожьхэм лIэшIэгъубэ къызэпызычыгъэ цIыфыгъэ шэпхъэ дахэхэр арылъых, лъэпкъ хабзэхэр къащаухъумэх, зыщыпсэухэрэ лъэныкъоми, зэрэпсаоу хэгъэгуми янеущырэ мафэ лъапсэ фашIы. Ащ фэдэ унагъохэр непэ къедгъэблэгъагъэх. УФ-м и Президент иунашъокIэ мы илъэсыр Унагъом и Илъэсэу зэрэщытыр къыдэтлъыти, сабыибэ зэрысхэр къыхэтхыгъэх. Къыхэзгъэщымэ сшIоигъу, ащ фэдэ унагъохэм ищыкIэгъэ IэпыIэгъур ягъэгъотыгъэнымкIэ программэ зэфэшъхьафхэр республикэм щыпхырыщыгъэнхэм, сыд фэдэрэ Iофтхьабзэу унагъохэм афэгъэхьыгъэу етхьыжьэхэрэм Адыгеим и ЛIышъхьэу КъумпIыл Мурат лъэшэу ынаIэ зэратетыр, къотэгъу къызэрэтфэхъурэр. Унагъом иджэныкъо машIо зымыгъэкIуасэхэрэр унэгъо ныбжьыкIэхэм щысэшIу афэхъунхэу сафэлъаIо, мэфэкIымкIэ сафэгушIо, — къыIуагъ Адыгеим и ЗАГС ипащэу Лариса Волчановскаям.
Нэужым унагъоу къырагъэблэгъагъэхэр пчэгум къыращагъэх. Пащенкэхэу Сергейрэ Татьянэрэ Шэуджэн районым къикIыгъэх. Илъэс 19-кIэ узэкIэIэбэжьмэ ахэм унагъо зэдашIэнэу рагъэжьагъ. ГушIуагъуи, къиныгъуи зэпачыгъэр макIэп. Ау сыд хъугъэми, зэдеIэжьхэзэ, унагъор ыпэ рагъэшъыгъ, сабыи 7 зэдапIугъ.
Лъэустэнджэлхэу Къэплъанрэ Иринэрэ яунагъо Кощхьэблэ районым къикIыгъ. Ахэр ныбжьыкIэх: Къэплъан илъэс 36-рэ, Иринэ илъэс 32-рэ аныбжь. Унагъо зашIэгъэ илъэс 13-м къыкIоцI сабыитф зэдапIун алъэкIыгъ. ЗэгурыIоныгъэрэ шъхьэкIэфэныгъэрэ азыфагу илъэу ясабыйхэр зэрапIущтым анаIэ тырагъэты.
КIэлэцIыкIуи 8 зыпIурэ Троценкэхэм яунагъо Джэджэ районым къикIыгъ. Зэшъхьэгъусэхэу Сергейрэ Людмилэрэ кIэлиплIырэ пшъэшъиплIырэ зэдапIу. Анахь шъхьаIэу ахэм алъытэрэр фэбэныгъэ, гукIэгъу зэфыуиIэныр ары. Сабыибэ ппIуныр Iоф мыпсынкIэу зэрэщытыр зэкIэми тэшIэ. Ау мы унагъом исхэм зыкIыныгъэ азыфагу илъэу сыд фэдэрэ Iофи агъэцакIэ.
Тэхъутэмыкъое районым щыщ Тэкъашхэу Нурдинрэ Сусаннэрэ яунагъо кIэлэцIыкIуи 5 къихъухьагъ. ЩыIэныгъэ гъогум зызэдытетхэр илъэс 22-рэ хъугъэ. ШIулъэгъуныгъэрэ зэгурыIоныгъэрэ зэрылъ унагъом къихъухьэрэ сабыйхэм щыIэныгъэм чанэу зыкъыщагъэлъагъо.
Хъунэхэу Артуррэ Заремэрэ шъхьэгъусэ зызэфэхъугъэхэр илъэс 16 нахь мыхъугъэми, сабыи 6 зэдапIун алъэкIыгъ. Мыхэр Красногвардейскэ районым къикIыгъэх. Унагъом имэхьанэ агъэлъапIэзэ, шIулъэгъуныгъэр азыфагу илъыным, зэфагъэгъужьыным ялъфыгъэхэр фагъасэх.
ЛIыгъэу фэплъэгъунэу щыт нэбгырэ 11 къызфэхъугъэ Марина Ильченкэм. Ащ ишыхьат медалэу «Ным ищытхъу» зыфиIорэр къызэрэфагъэшъошагъэр. Ишъхьэгъусэу Алексейрэ ежьыррэ Мыекъуапэ щэпсэух, илъэс 23-рэ хъугъэу зэкIыгъух.
Теуцожь районым къикIыгъэх кIэлэцIыкIуи 6 зэдэзыпIухэрэ Хъуадэхэу Артуррэ Иринэрэ ыкIи кIэлэцIыкIуи 5 зиIэ Нэпсэухэу Юсыфрэ Фатимэрэ яунагъохэр. Мыхэм зэралъытэрэмкIэ, унагъомкIэ анахь насыпыгъэр сабыйхэр ары.
МэфэкI Iофтхьабзэм къырагъэблэгъэгъэ унагъохэм такъикъ гушIуагъохэри, гузэжъогъу чIыпIэхэри апэ къикIыгъэх, ау зэгурыIоныгъэу азыфагу илъым, зэфыщытыкIэ дахэу зэфыряIэм яшIуагъэкIэ гумэкIыгъохэр къызэранэкIынхэ алъэкIыгъ. ЩысэтехыпIэ пшIын унэгъо дахэ-
хэр Адыгеим зэрисхэм урыгушхонэу щыт!
Iэшъынэ Сусан.