УФ-м Президентэу Владимир Путиным видеокон­ферен­цие шIыкIэм тетэу Урысые Федерацием и Правительствэ хэтхэм тыгъуасэ зэIукIэ адыриIагъ. Хэгъэгум ишъолъырхэм япащэхэр, Адыгеим и ЛIышъхьэу КъумпIыл Мурати ахэм ахэтэу, Iофтхьабзэм хэлэжьагъэх.

УФ-м ишъолъырхэм ясоциальнэ-экономикэ хэхъоныгъэкIэ унэе программэхэр зэрагъэцакIэхэрэм, 2025 — 2030-рэ илъэсхэм ателъытэгъэ ащ фэдэ программакIэхэм яухэсын, шъолъырхэм хэхъоныгъэ ягъэшIыгъэным япхыгъэ Iофыгъохэм мыщ щатегущыIагъэх.
БлэкIыгъэ илъэсхэм шъолъырхэм азыныкъо нахьыбэр унэе программэхэм ягъэцэкIэнкIэ гурытымкIэ Урысыем гъэхъагъэу щашIыгъэхэм ашъхьэдэкIыгъэх. Джащ епхыгъэу а программэхэр лъагъэкIотэнхэу унашъо ашIыгъ. Къэралыгъом ипащэ Федеральнэ ЗэIукIэм зызэрэфигъэзэгъэ тхыгъэм ащ фэгъэ­хьыгъэу къыщиIуагъ. Мы лъэныкъомкIэ Iофэу ашIагъэхэм зэIукIэм щядэIугъэх.
УФ-м экономикэ хэхъоныгъэмкIэ иминистрэу Максим Решетниковыр, партиеу «Единэ Россием» и Генеральнэ совет и Секретарь ипшъэрылъхэр зыгъэцэкIэрэ, УФ-м и Президент и Полномочнэ лIыкIоу Урал федеральнэ шъолъырым щыIэ Владимир Якушевыр Iофтхьабзэм къыщыгущыIагъэх.
Максим Решетниковым къызэрэхи­гъэщыгъэмкIэ, мылъкум ипроцент 98-р экономикэм изыкъегъэIэтын пэIуагъэ­хьащт. Рахъухьэрэ проектхэм яшIуагъэкIэ инвестициехэр нахьыбэу къахалъхьан, IофшIэпIэ чIыпIэкIэ мин 18 зэхащэн, IофшIэным ипроизводительность зыкъы­рагъэIэтынэу алъэкIыщт.

ЗэIукIэм зэрэщыхагъэунэфыкIыгъэмкIэ, анахьэу акIуачIэ зэрахьылIэщтыр инфраструктурэ пэрыохъухэр дэгъэзыжьыгъэнхэр, экономическэ шъолъыр шъхьафхэм, технопаркхэм, промышленнэ паркхэм зягъэушъомбгъугъэныр ары. ГущыIэм пае, промышленнэ шъолъырэу «Инэмым» игъэпсын Адыгеим щылъагъэкIотэщт, фэгъэкIотэныгъэ яIэу бизнес цIыкIумрэ гурытымрэ арылъхэр мыщ щылэжьэнхэ алъэкIыщт.
ЗэIукIэм зэрэщыхагъэунэфыкIыгъэмкIэ, унэе программэхэр нахьышIоу агъэ­цэкIэнхэм пае лъэпкъ проектхэмрэ нэмыкI федеральнэ программэхэмрэ амалэу къатыхэрэр нахь икъоу шъо­лъыр­хэм къызфагъэфедэн фае. Максим Решетниковым къызэриIуагъэмкIэ, ­лъэпкъ проектэу «ЗекIонымрэ хьакIэпэгъокIынымрэ» зыфиIорэм къыдыхэ­лъытагъэу зекIонымкIэ кластерэу агъэ­псырэм иинфраструктурэ ишIынкIэ Iоф­тхьабзэхэр джыдэдэм Адыгеим щызэрахьэх. Унэе программакIэм диштэу зыгъэпсэфыпIэу «Лэгъонакъэ» псырыкIуапIэхэр, газрыкIуапIэхэр, электроэнергиер аIэкIэзыгъэхьащт псэуалъэхэр зэрэщагъэпсыщтхэ мылъкур къыха­гъэкIыщт.
Шъугу къэтэгъэкIыжьы 2024-рэ илъэ­сым нэс Адыгэ Республикэм социальнэ-экономикэ хэхъоныгъэ зэришIыщт программэр зэрагъэцакIэрэм осэ дэгъу къызэрэфашIыгъагъэр, шIуагъэ къытэу программэм къыдилъытэрэ мылъкур Адыгеим ыгъэфедэн зэрилъэкIыгъэр. Ащ ишIуагъэкIэ мы аужырэ илъэсхэм шъо­лъырым иэкономикэ гурытымкIэ хэ­гъэгум гъэхъагъэу щашIыгъэхэм анахьи фэдитIукIэ нахьыбэу зыкъызэриIэтыгъэр къыхагъэщыгъ.
КъумпIыл Мурат зэIукIэм икIэуххэм къатегущыIэзэ зэрэхигъэунэфыкIыгъэмкIэ, унэе программэр ыпэкIэ къэуцу­гъэгъэ Iофыгъохэм язэшIохыни, инвестициехэр нахьыбэу къахалъхьанхэми афэлэжьагъ. УФ-м и Президент ыштэгъэ унашъом тетэу социальнэ-экономикэ хэхъоныгъэ зэрашIырэ унэе программэ­хэм Адыгеир джыри ахэлэжьэщт. ПрограммакIэр 2025 — 2030-рэ илъэсхэм агъэцэкIэщт, федеральнэ бюджетым имылъкоу сомэ миллиарди 6 ащ пэIу­хьащт. Экономикэм зыкъезыгъэIэтыщт Iофтхьэбзи 7 зэрахьанэу рахъухьэ. Ана­хьэу анаIэ зытырагъэтыщтыр бизнес цIы­кIум, гурытым, агропромышленнэ комплексым IэпыIэгъу ягъэгъотыгъэныр, зекIоным, промышленностым амалэу яIэхэм ахэгъэхъогъэныр ары.
«Адыгэ Республикэм социальнэ-экономикэ хэхъоныгъэ зэришIыщт унэе программакIэм диштэу тапэкIэ тылъыкIотэщт. Депутатхэр, республикэм ыцIэкIэ сенаторхэр, бизнесменхэр ягъусэхэу программэм хагъэхьащт IофтхьабзэхэмкIэ предложениехэр къагъэхьазырыгъэх. Урысыем экономикэ хэхъоныгъэмкIэ и Министерствэ федеральнэ министерст­вэхэм яспециалистхэр къыхэлажьэхэзэ предложениякIэхэм щатегущыIагъэх», — къыIуагъ КъумпIыл Мурат.
Унэе программэм иIофтхьабзэхэу 2030-рэ илъэсым нэс зэрахьащтхэм яшIуагъэкIэ мыбюджет инвестициехэм, хэбзэIахьхэм къахэхъонхэу, IофшIэпIэ чIыпIакIэхэр бэу зэхащэнхэу мэгугъэх.
«Урысыем и Президентэу Владимир Путиным лъэшэу тыфэраз Адыгэ Респуб­ликэм пае программэр лъыгъэкIотэ­гъэнэу унашъо зэришIыгъэм пае. УФ-м и Правительствэ программэр зиухэсыщтым джыдэдэм тежэ къихьащт илъэсым ащ игъэцэкIэн тыублэным пае. Программэм къыдыхэлъытэгъэ Iофтхьабзэхэмрэ агъэкIэжьыгъэ лъэпкъ проектхэмрэ ягъэ­цэкIэн ыуж титыщт. ЦIыфхэм ящы­IэкIэ-псэукIэ зыкъезыгъэIэтыщт, социаль­нэ-экономикэ хэхъоныгъэ языгъэшIыщт лъэныкъохэм тащылъыкIотэным ти­шъыпкъэу тыпылъыщт», — къыIуагъ Адыге­им и ЛIышъхьэ.
АР-м и ЛIышъхьэ ипресс-къулыкъу къытыгъэ къэбархэмкIэ ЛIышэ Саныет.