Республикэм и Мафэу къэблагъэрэм ихэгъэунэфыкIын фэгъэзэгъэ зэхэщэкIо комитетым тыгъуасэ зэхэсыгъо иIагъ. Ащ тхьамэтагъор щызэрихьагъ АР-м и ЛIышъхьэ ыкIи министрэхэм я Кабинет я Администрацие ипащэу Владимир Свеженец.

Зэхэсыгъом хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет хэтхэр, муниципальнэ образованиехэм, къулыкъу зэ­фэ­шъхьафхэм япащэхэр.
АР-м лъэпкъ IофхэмкIэ, Iэ­кIыб къэралхэм ащыпсэурэ ти­лъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр шъолъыр мэфэкIым зэхащэщтхэм къатегущыIэзэ къызэри­IуагъэмкIэ, цIыфхэр жъугъэу зыхэлэжьэщтхэ Iофтхьабзэхэр чъэпыогъум и 4 — 5-м щыIэщтых.
Апэрэ мафэм республикэм щыпсэоу къэралыгъо тын зэ­фэшъхьафхэмкIэ къыхагъэщыгъэхэм ахэр зыщаратыжьыщтхэ Iофтхьабзэр, нэужым мэфэкI зэхахьэр АР-м и Къэралыгъо филармоние щыкIощтых. Ахэр Адыгеим иорэдыIохэмрэ къэ­шъо­кIо ансамблэхэмрэ зыхэлэ­жьэщтхэ концерткIэ аухыщтых.
КъыкIэлъыкIорэ мафэм, чъэ­пыогъум и 5-м, хэбзэшIу зэрэ­хъугъэу, шыгъачъэ республикэ ипподромым щыIэщт. ПэшIо­рыгъэшъэу зэрагъэнэфагъэмкIэ, ар пчэдыжьым сыхьатыр 11-рэ ныкъорэм рагъэжьэщт. АщкIэ мэфэкIыр къызэIуахыщт.
Ащ нэмыкIэу Мыекъуапэ икъэлэ парк, бульварэу «Те­кIоныгъ» зыфиIорэм, нэмыкI чIыпIэхэм культурнэ ыкIи спорт Iофтхьэбзэ зэфэшъхьафхэр ащы­­зэхащэщтых. Пчыхьэм Лениным ыцIэ зыхьырэ гупчэм гала-концерт щыкIощт. Пчыхьэм сыхьатыр 6-м ар рагъэжьэщт.
Владимир Свеженец къы­зэриIуагъэмкIэ, ащ республикэм иорэдыIохэр, иансамблэхэр ары хэлэжьэщтхэр, Урысыем «ижъуагъохэм» ащыщ къырагъэблэгъэн гухэлъ яIэп. МэфэкIыр мэшIоустхъокIэ аухы хэбзагъ, ау мыгъэ ар хэтыщтми джыри рахъухьагъэгоп.
Республикэм имуниципальнэ образованиехэми мэфэкI Iоф­тхьабзэхэр ащыкIощтых, мы ма­фэхэм ахэр агъэнафэх, зафагъэхьазыры.
— ХэушъхьафыкIыгъэ дзэ операцием хэлажьэхэрэм яуна­гъохэм тафэгушIощт, мэфэкI зэхахьэхэм къядгъэблэгъэщтых. Ар типшъэрылъ шъхьаIэхэм ащыщ. Район ыкIи къэлэ администрациехэм япащэхэм ащ анаIэ тырагъэтын фае, — къы­Iуагъ Владимир Свеженец.
Джащ фэдэу АР-м и ЛIы­шъхьэ пшъэрылъ къызэришIыгъэу чIыпIэхэр зэрагъэкъэбзэщтхэр, ащ пае мэзэ IофшIэнхэр зэрагъэ­нэфагъэхэр ащ къыхигъэщыгъ.
МэфэкI Iофтхьабзэхэр щы­нэгъончъэнхэм хэбзэухъумэкIо къулыкъухэр фэгъэзэгъэщтых. А мафэхэм ахэм гъэлъэшыгъэу Iоф ашIэщт, цIыфыбэ зыщызэхэхьащт чIыпIэхэр полицием ыкIи Росгвардием ахэтхэм къагъэгъунэщтых, медицинэм иIофышIэхэри IэпыIэгъу хъунхэм фэхьазырыщтых.
ХЪУТ Нэфсэт.