Ветеранхэм я Урысые общественнэ организацие и Адыгэ республикэ къутамэу «ДзэкIолI зэкъошныгъэр» зыфиIорэм ГуфэкIо ротэ иIэ хъугъэ.

Ротэм хэтхэ Андрей Ткачевымрэ Никита Лит­виненкэмрэ Iоныгъом и 9-м гурыт еджапIэу N 17-м Iофтхьабзэ щызэхащагъ. Ар ублэпIэ дзэ ухьазырыныгъэм фэгъэхьыгъагъ.
ЕджапIэм икIэлэеджа­кIохэу я 5-рэ «В», «Г» ыкIи я 9-рэ «А» классхэм арысхэр мыщ къыхагъэлэжьагъэх. ГуфэкIо ныбжьыкIэхэм сыхьатэу щырагъэкIокIыгъэм лъыкIэкIыныр, фыкъоныгъэ лъэпкъэу щыIэхэр ыкIи ащ фэдэ зыхъурэм апэрэ медицинэ IэпыIэгъур зэрябгъэгъотыщт шIыкIэхэр арагъэлъэгъугъэх. Сыда пIомэ ащ фэдэ шIэныгъэхэр яIэнхэм, чIыпIэ гузэжъогъу зифэхэкIэ тхьамыкIагъо къызэхъулIагъэм къэмыщтэхэу игъом IэпыIэгъу рагъэгъотыным мэхьанэ иI.
Джащ фэдэу дзэкъулыкъушIэхэм ащыгъ шъуа­шэхэм ыкIи джырэ лъэ­хъаным диштэрэ ухъумэн амалхэу зэолIхэм агъэфедэхэрэм ныбжьыкIэхэр нэIуасэ афашIыгъэх.
Егъэджэгъу сыхьатыр гъэшIэгъонэу рекIокIыгъ, кIэлэеджакIохэм зэкIэри агу зэрэрихьырэр къахэщэу гуфакIохэм упчIабэ къафагъэзагъ.
Iэшъынэ Сусан.