Адыгэ Республикэм и Камернэ музыкальнэ театрэу Хьанэхъу Адам ыцIэ зыхьырэм къэгъэлъэгъоныкIэм изыфэгъэхьазырын ыухыгъ.

Театрэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс къызэриIуагъэмкIэ, Галина Лодяновам итхыгъэу «Тыргъэтао» Iоф да­шIагъ. Шъугу къэдгъэкIыжьын, АР-м культурэмкIэ и Министерствэ драматург­хэм азыфагу зэнэкъокъоу щызэхищэ­гъагъэм Галина Лодяновам ипьесэу «Тыргъэтао» хэлэжьагъ ыкIи я 3-рэ чIы­пIэр къыщыдихыгъ. Партиеу «Единэ Россием» ипроектэу «Хэгъэгу цIыкIум икультур» зыфиIорэм игрант ишIуагъэкIэ къэгъэлъэгъоныр театрэм ыгъэуцугъ. Ащ фэгъэхьыгъ театрэм ихудожественнэ пащэ гущыIэгъоу дэтшIыгъэр.
— Адыгэ лъэпкъым итарихъ илъэс 2400-кIэ узэкIэIэбэжьмэ къыхэхъухьэгъэгъэ хъугъэ-шIагъэм сыда зыкIыфэжъугъэза­гъэр?
— Адыгэ Республикэм илъэпкъхэм якультурэ къэухъумэгъэным фэшI искус­ствэм епхыгъэ IофшIагъэхэм мэхьанэшхо яIэу сэлъытэ. Тарихълэжьхэм зэралъытэрэмкIэ, меотхэмрэ синдхэмрэ адыгэ лъэпкъым иатэпIашъэхэр атекIыгъэхэу ары, ахэм ялъэхъан IофшIагъэм къырегъэлъэгъукIы. Ащ пылъ тарихъыр зэкIэ къэбгъэлъэгъошъущтэп, ау авторым IэубытыпIэ ышIырэр зы Iахь.
— Къэгъэлъэгъоным Iоф дэзы­шIагъэхэм ягугъу къыт­фэшIба.

— Сэ къэгъэлъэгъоным режиссерэу сыдэлэжьагъ. Артист закъохэр арэп спектаклым хэлажьэрэр, оркестрэ псау игъус. ЛIый Бэлэ Тыргъэтао ироль къе­шIы. Артистхэм ащыгъыщтым Даур Людмилэ фэгъэзагъ. Сценографиер Сихъу Рэмэзан ыпшъэ илъ. Мэкъамэхэр композиторэу Андрей Семеновым ытхыгъэх ыкIи дирижерэу хэлажьэ. Москва щыщ Владислав Старчевскэм усэхэм Iоф адишIагъ. Хореографиер Хъоджэе Иланд ыгъэуцугъ. Iоныгъом и 27-м апэрэу къэдгъэлъэгъонэу тетыубытагъ. ТызэрэгугъэрэмкIэ, еплъыхэрэм ашIогъэшIэгъон хъущт.
— IофшIэныкIэм укъытфытегущыIагъэмэ дэгъугъэ.
— Гум къыпкъырыкIызэ псэурэ адыгэхэм къакIугъэ щыIэныгъэ гъогу мыпсынкIэр къэгъэлъэгъоным пхырыщыгъ. Гупшысэ куу хэлъ. Синдхэмрэ меотхэмрэ урымхэм сатыу адашIы­щтыгъ. Боспорыпщым хьилагъэкIэ чIыгур атырихынэу фежьагъ. Ар зыфэмыщэчыгъэ Тыргъэтао бзылъфыгъэ лъэшэу къы­чIэкIыгъ, илъэпкъ игъунапкъэхэр къыгъэ­гъунагъэх, яшъхьафитныгъэ къыухъу­магъ.
Театрэм пшъэрылъ шъхьаIэу иIэр тикультурэ икIэн бай къэтыухъумэныр ары. Непэрэ мафэм ар зэрифэшъуашэу тэгъэцакIэу сэлъытэ. НыбжьыкIэхэм титарихъ ятэгъашIэ.
— Актерхэм къэгъэлъэгъоным къин далъэгъугъа?

— Роль пэпчъ сабыим фэдэу зэхэошIэ, апэ ощынэ, етIанэ екIолIакIэ къы­фэогъоты, уесэ, нэужым угу фэбагъэ къыфехьэ, шIу олъэгъу. Актер пэпчъ зыфэгъэзэгъэ ролыр пкъырыхьагъ, къа­дэхъугъ. Камернэ музыкальнэ театрэм щылажьэхэрэм анэмыкIэу Къэралыгъо академическэ ансамблэу «Налмэсым» икъэшъуакIохэр, Къэралыгъо симфоническэ оркестрэм имузыкантхэр, купэу «Ошъутенэм» иорэдыIохэр, Лариса Тупчевар зипэщэ кIэлэцIыкIу къэшъокIо купэу «Сюрприз» зыфиIорэр къэгъэлъэ­гъоным хэлэжьагъэх. Адыгэ шъуашэм идэхагъи, къашъом купкIэу иIэри, лъэпкъ шэн-хабзэхэри къашъом щыпхырыт­щыгъэх.
— «Тыргъэтао» адыгэ лъэп­къым икультурэ IофшIэгъэ хэхыгъэу къыхэнэщтэу къысщэхъу.
— Театрэм пIуныгъэ мэхьанэу иIэм зэрэхэхъуагъэм, ар щыIэныгъэм зэрэщыщым, лIэшIэгъухэр ыкIи лIэужхэр зэрэзэрипхыхэрэм щэч хэлъэп. Мы къэгъэлъэгъоныр лъэпкъ культурэм къы­хэнэщт. Адыгэ Республикэм и Камернэ музыкальнэ театрэ иIофшIэгъу лъэхъан цIыфхэр ыгъэгушIощтых. Адыгеим икультурэ титеатрэ чIыпIэ гъэнэфагъэ щиубытыгъ. Анахь цIыкIухэм къащегъэжьагъэу анахьыжъхэм анэсэу тикъэгъэлъэ­гъонхэм зэплъынхэ ахагъотэщт. ЦIыфхэм тызэлъашIэ, тадэжь къэкIох, къытэплъы­хэрэм тафэшъыпкъэу тэлажьэ.
— ЛъэхъаныкIэр мафэкIэ ежъу­гъэжьэнэу тышъуфэлъаIо.
— Шъопсэу.
Лъэпшъыкъо Фатим.