ИкIыгъэ тхьамафэм, Iоныгъом и 2 — 8-м, Адыгеим игъогухэм хъугъэ-­шIэгъи 6 къатехъухьагъ, ахэм
апкъ къикIыкIэ нэбгыри 8-мэ шъобж­хэр атещагъэх. Тхьамафэм къыкIоцI ешъуа­гъэу автомобилыр зезыфэ­щтыгъэ нэбгырэ 19 къаубытыгъ.

Ащ нэмыкIэу, пIалъэу зигугъу къэтшIырэм къыриубытэу шъобжхэр зыхамыхыгъэ гъогу-транспорт хъугъэ-шIэгъи 111-рэ тишъолъыр щатхыгъ. Ахэм ащыщэу нахьыбэр зыщагъэунэфыгъэр къалэу Мыекъуапэ — 39-рэ ыкIи Тэхъутэмы­къое районыр — 29-рэ.
Къэралыгъо автоинспекцием къызэритырэмкIэ, хъугъэ-шIэгъэ 30-мэ лъапсэ афэхъугъэр машинэхэм азыфагу илъын фэе зэпэчыжьагъэр зэраукъуагъэр ары, адрэ хъугъэ-шIэгъэ 18-мэ — зикIогъу автомобилыр благъэкIыгъэп, 6-р — тэрэзэу къызэрэзэкIэмыкIуагъэхэм япхыгъ, 2-р — дэчъэхыгъэх, 22-р — щыт транспортым еутэкIыгъэх.
А мафэхэм къакIоцI гъогурыкIоным ишапхъэхэм япхыгъэу укъоныгъэ 1450-рэ зэрахьагъэу инспекторхэм къыха­гъэщыгъ.
Ешъуагъэу къаубытыгъэ водитель 19-мэ административнэ пшъэдэкIыжь арагъэхьыщт. Джащ фэдэу лъэсрыкIо 81-мэ административнэ протоколхэр афатхыгъэх.
ГъогурыкIоным ишапхъэхэр шIокI имыIэу агъэцэкIэнхэу Адыгеим и Къэралыгъо автоинспекцие транспорт амал­хэр зезыфэхэрэм закъыфегъазэ. Анахьэу мэзэхэ уахътэм сакъыныгъэ къызхагъэ­фэнэу, псынкIэу мызекIонхэу.